Sánchez, ao PP: "Que pouquiña xente de ben hai no seu país e que poderosa é"

A frase pronunciada onte no Senado polo presidente do PP, Alberto Núñez Feijoo, pedíndolle ao presidente, Pedro Sánchez, que "deixe de molestar a xente de ben" pola lei trans e a lei do 'só si é si' salpicou o cara a cara entre o xefe do Goberno e a portavoz do PP esta mañá no Congreso.

Cuca Gamarra acusou o presidente do Goberno de "traizoar" os seus votantes e pregúntase por que con estes asuntos non houbo cesamentos e coa polémica dos trens, si. Sánchez bótalle en cara ao PP que votase en contra da suba do SMI ou da revalorización dos pensións, e aféalles aos populares estar do lado dos poderosos.

"Cando votan que non ao salario mínimo interprofesional é porque interpretan que os seus beneficiarios non son xente de ben; cando votan en contra da revalorización das pensións considerarán que os pensionistas non son xente de ben, ou cando votan en contra do imposto ás grandes enerxéticas ou ás grandes entidades financeiras será porque consideran que esa xente si é de ben".

Na sesión de control, a voceira dos populares no Congreso, Cuca Gamarra, reclamou o cesamento da ministra de Igualdade, Irene Montero, polas consecuencias da entrada en vigor da lei do 'só si é si'.

Gamarra afirma que 544 delincuentes sexuais beneficiáronse da entrada en vigor da lei e máis de cincuenta foron excarcerados antes de tempo. Cre que Sánchez está "atrasando" a resolución deste asunto por un "interese persoal".

"É tan inexplicable a súa actitude que parece ter un interese persoal en atrasar a solución; a ver se o que vostede quere é conseguir un titular o 8-M".

A portavoz do PP no Congreso acusa o presidente do Goberno de sumar "pobreza e desigualdade". Ínstao a visitar un supermercado para comprobar como afecta a suba dos prezos a cesa da compra e bótalle en cara as diferentes solucións achegadas polas partes socialista e morada do seu Goberno para tentar poñerlle freo.

"Para estar no seu Goberno é mellor estar como comunista que como socialista porque dos corenta ministros que leva non se atreveu a tocar a ningún de Podemos. E mire que o están traballando...".

O presidente do Goberno replica que España é a economía de Europa que máis medrou o ano pasado e tamén no presente exercicio e que temos a inflación máis baixa da Unión Europea.

Aféalle ao PP que non "boten unha man en nada" e explica:

"Este Goberno sumou cos traballadores e traballadoras subindo o SMI ou aprobando a reforma laboral; coas mulleres, coas leis feministas, e cos pensionistas, revalorizando as pensións conforme o IPC e vostedes votaron en contra".

Na sesión de control tamén interveu a ministra de Igualdade, que volveu pedirlle ao PSOE que sente a negociar a reforma da lei ata chegar a un acordo, para non darlle "a oportunidade aos reaccionarios, aos inimigos dos dereitos das mulleres, de volver ao Código Penal da Manada".

A maioría dos socios de investidura avalan a postura de Irene Montero. O voceiro de ERC, Gabriel Rufián insistiu en que o seu partido non vai "tirar cara adiante sen o ministerio de Igualdade".

Si volveu a ofrecer os seus votos o PP, pero o PSOE, polo momento, desdeña a oferta.