Sexta xornada sen gañar dun Bergantiños que precisa unha reacción inmediata

A crise do Bergantiños entra nun momento crítico. Sumou a sexta xornada sen gañar e perdeu ante un rival directo, como o Oviedo Vetusta, que está a saír da queima. Xusto no intre en que se afunde o equipo de Carballo saca a cabeza o Oviedo, que contou co acerto goleador do portugués Masca e coa colaboración do colexiado que asubiou un incrible penalti de Sellés. 

Aos seis minutos marcou o dianteiro do Oviedo o primeiro tanto. Iso provocou os nervios no equipo de Lemos, que volveu estar por debaixo do seu nivel. O definitivo 0-2 chegou despois dun penalti moi polémico. Parecía falta cometida sobre Sellés pero o colexiado sorprende asubiando un penalti, que volveu transformar Masca, que leva cinco goles nas últimas dúas xornadas.