Sunak destitúe a ministra do Interior e recupera a Cameron para Exteriores

O exprimeiro ministro británico David Cameron entrou este luns no Goberno de Rishi Sunak como responsable de Exteriores en substitución de James Cleverly, como parte dunha remodelación do Executivo na que a controvertida titular de Interior, Suella Braverman, deixou o seu cargo.

Para asumir o cargo, Cameron será nomeado lord co fin de entrar como parlamentario na Cámara Alta, requisito para poder incorporarse ao Executivo.

O nomeamento de Cameron, que dimitiu en xuño de 2016 como primeiro ministro tras perder o referendo do Brexit, causou enorme sorpresa en medios de comunicación e analistas do Reino Unido.

Tras abandonar Downing Street, Cameron non continuara como deputado e abandonara a primeira fila da política británica para involucrarse na empresa privada.

Antes, Sunak nomeou a Cleverly novo responsable de Interior, tras a destitución de Suella Braverman desa carteira por mor da polémica por criticar ás forzas da orde. ás que acusou de "dobre vara de medir" e de favorecer as manifestacións propalestinas

Braverman, da á máis á dereita do Partido Conservador, pedira á Policía Metropolitana de Londres (Met, en inglés) que prohibise a marcha por temor a disturbios e a fomentar o antisemitismo, pero as forzas de seguridade rexeitaron esa proposta e a manifestación tivo lugar este sábado. 

O xefe do Goberno conservador lanzou este luns unha remodelación do seu Executivo, para as eleccións xerais previstas para 2024, posiblemente en maio.

Fontes do Partido Conservador, no poder, indicaron que Sunak iniciou a remodelación para "reforzar o seu equipo no Goberno a fin de tomar decisións a longo prazo para un futuro máis brillante".

Tras coñecerse a súa destitución, Braverman dixo que foi "o maior privilexio" da súa vida servir como titular de Interior e agregou que terá "máis que dicir no seu debido momento".