Trasladan carbón desde Ferrol á central das Pontes, que pode volver operar en decembro

Medio cento de transportistas das Pontes comezaron esta mañá o traslado de cen mil toneladas desde o porto exterior de Ferrol ao parque Endesa, ante a posibilidade de arranque da central térmica.

Estas primeiras cen mil toneladas servirán para que, en caso de que sexa necesario, entre en funcionamento a central térmica das Pontes pechada desde o mes de xullo.

O movemento de carbón mobilizou medio cento de transportistas e a previsión é que haxa traballo para un mes e medio. Os transportistas aseguran que aínda se agardan outras 80.000 toneladas de carbón que chegarán a este porto exterior de Ferrol a comezos do mes de decembro.

Son os primeiros camións, con contrato en vigor, para o transporte de carbón, que comezan a trasladar cara ao parque que Endesa ten na central térmica das Pontes un total de 180.000 toneladas, das que cen mil xa están almacenadas no porto exterior de Ferrol.

Imaxe do porto de Ferrol onde se cargaron os camións de carbón

O presidente dos transportistas do carbón, Manuel Bouza, comentou que "van intentar poñela en marcha o 22 deste mes, e despois será cando faga falta ou sexa máis rendible que o gas. Imos traballar mes e medio, pero que ninguén pense que isto vai seguir. O que se pensa é que isto vai estar de reforzo todo o inverno despois... a central térmica das Pontes, desgraciadamente, está condenada a morrer".

Pola súa banda, Marcos Prieto de UXT-Endesa argumentaba que "é unha decisión empresarial. Todo o mundo di que dentro da xestión das empresas ninguén pode meterse. Se ben é certo que isto é un negocio regulado e o Goberno o que ten que garantir é a subministración enerxética de calidade e o custo moderado para toda a poboación. Nese marco si entendemos que o Goberno debería posicionarse e falar coas eléctricas e dicir imos intentar minimizar o impacto do peche".

Este abastecemento prodúcese coa planta en pleno proceso de desmantelamento.