O Goberno reforzará a capacidade de resposta de Salvamento Marítimo

O Consello de Ministros aprobou un novo Plan Nacional de Salvamento Marítimo cun investimento de 163 millóns de euros para o próximos tres anos, que servirá para modernizar e fortalecer a súa capacidade de resposta ante accidentes marítimos coa implementación de novas tecnoloxías.

Este plan incluirá a creación dun centro de coordinación en Palma de Mallorca, a construción de dous buques remolcadores, novas patrulleiras e a incorporación de drons, segundo explicou este martes a portavoz do Executivo, Pilar Alegría.

En concreto, para a renovación de embarcacións van destinar 84,6 millóns de euros para a construción de dous buques, remolcadores, dúas novas patrulleiras de salvamento e seis embarcacións lixeiras de acción rápida.

A esta cantidade súmanse outros 27 millóns para a adquisición dun helicóptero, ademais da incorporación de drons e a posta en marcha do centro de coordinación en Palma de Mallorca.

O obxectivo é fortalecer o sistema de resposta a incidentes e accidentes marítimos, implementar novas tecnoloxías, reforzar a loita contra o cambio climático e promover a seguridade e a protección dos mares e océanos.

O Plan Nacional de Salvamento Marítimo 2025-2027 desenvólvese ao redor de dous eixos e dez liñas estratéxicas aliñadas coas principais políticas e disposicións legais nacionais e internacionais.