Remolcan ao porto de Vigo un buque portacoches con problemas no motor

Dous remolcadores acudiron a auxiliar o buque portacoches Grande Atlántico, da navieira Grimaldi, que se dirixía ao porto de Vigo, tras pedir asistencia logo de sufrir problemas no motor cando navegaba á altura de Monteferro.

Segundo informaron fontes de Salvamento Marítimo, ocorreu sobre as 8:00 horas deste domingo. O buque, que saíu do porto de Zeebrugge, en Bélxica, quedou atracado na terminal de vehículos de Bouzas.

Non é a primeira vez que ten problemas un dos buques desta compañía. No peirao da Estación Marítima de Vigo segue amarrado outro barco tres meses despois de quedar á valga cando navegaba fronte a Viana do Castelo.