Morren tres turistas estranxeiros e o maquinista tras caer un teleférico en Nápoles
O único sobrevivente é un home duns 30 anos, de nacionalidade israelí, hospitalizado en estado grave
"A escena que se nos presentou ante nós era aterradora", sinalan os rescatadores
Alessandro Garofalo/LaPresse via/DPA
Dous turistas británicos e un israelí xunto co maquinista son as vítimas do accidente que se produciu este xoves tras caer a cabina dun teleférico da cidade italiana de Nápoles pola ruptura dun cable, mentres que un home tamén de nacionalidade israelí atópase hospitalizado en graves condicións.
Os falecidos son o israelí Janan Suliman, de 25 anos, a británica Margaret Elaine Winn, de 58 anos, o traballador da compañía do teleférico, Carmine Parlato , de 59 anos e o cuarto é outro cidadán británico, aínda sen identificar.
O único sobrevivente do accidente é un home duns 30 anos, de nacionalidade israelí, ingresado no hospital do Mar de Nápoles en estado grave.
"A escena que se presentou ante nós era aterradora. As árbores eran como lanzas. Só logramos rescatar a un ferido en estado moi grave, para os demais, lamentablemente, non había esperanza", explicou aos medios italianos, Salvatore Criscuolo, dos servizos de rescate.
Unha investigación determinará as causas do accidente
O accidente produciuse presumiblemente ao romper un dos cables do teleférico que une a localidade italiana de Castellamare dei Stabia, preto de Nápoles, coa cima do monte Faito, a máis de 1.100 metros de altura a beiras do mar Mediterráneo.
A ruptura do tensor fixo que dúas cabinas quedaran bloqueadas no aire: unha con once ocupantes e outra con cinco.
A primeira puido ser inmediatamente interceptada e os seus ocupantes rescatados sans e salvos, mentres que a segunda cabina caeu ao baleiro e tivo que ser buscada polos equipos de emerxencia.
O ministro de Infraestruturas e Transportes, Matteo Salvini, solicitou un informe sobre esta instalación, xestionada pola empresa Ente Autonomo Volturno (EAV), que realizara traballos de manutención só hai unha semana antes de abrir só hai uns días tras a pausa invernal, para determinar eventuais responsabilidades no ocorrido.
A Fiscalía abriu unha investigación polos delitos de homicidio culposo e homicidio múltiple.
Non é a primeira vez que este teleférico sofre un incidente. O máis grave ocorreu en agosto de 1960 cando, por un erro humano, unha cabina tocou terra ao non poder frear, causando catro mortos e 31 feridos no impacto, segundo lembran os medios locais.
