Trump autoriza a creación do fondo soberano dos Estados Unidos, que podería usarse para comprar TikTok

O presidente dos Estados Unidos, Donald Trump, asinou este luns a orde executiva que permitirá a creación dun fondo soberano que, previsiblemente, estará operativo dentro dun ano.

"Temos un potencial tremendo", asegurou Trump en declaracións aos xornalistas recollidas por 'Bloomberg'. O mandatario encargará ao secretario do Tesouro, Scott Bessent, e a Howard Lutnick, nomeado para secretario de Comercio, dar vida á proposta. Este último, de feito, apuntou á posibilidade de usar o fondo para a compra de TikTok.

A idea xa fora posta sobre a mesa por Trump durante a campaña electoral que lle devolveu á Casa Branca por segunda ocasión. O republicano deslizou, ademais, que as grandes empresas e Wall Street poderían asesorar a esta entidade sobre os investimentos para realizar.

En Estados Unidos existen varios fondos deste tipo, pero son de titularidade estatal. Neste sentido, o de Alaska botou a andar en 1976 e xestiona activos por valor de 82.000 millóns de dólares (79.715 millóns de dólares), mentres que o de Dakota do Norte deposita cada mes no seu o 30 % dos impostos ao petróleo e ao gas e posúe unha carteira de 11.500 millóns de dólares (11.180 millóns de euros).

O expresidente demócrata Joe Biden tamén coqueteou durante o seu mandato cun fondo soberano que financiase proxectos relacionados coa seguridade nacional, como o sector tecnolóxico, enerxético ou loxístico.