Trump di estar aberto a negociar aranceis só se é para resolver o déficit comercial

O presidente dos Estados Unidos Donald Trump dixo este domingo que está aberto a negociar a súa drástica política arancelaria só se serve para resolver o déficit comercial que ten o seu país coas outras nacións.

"Quero resolver o problema do déficit que temos coa China, coa Unión Europea e outras nacións. Se queren falar diso, estou aberto a falar. Pero pola contra, por que eu quixera falar con eles?", declarou á prensa a bordo do avión presidencial Air Force One.

Trump, que pasou os últimos días xogando ao golf en Florida, dixo que durante a fin de semana falou cos donos das grandes empresas tecnolóxicas e con líderes de todo o mundo, aínda que non especificou os países.

"Falei con moitos europeos, asiáticos, de todo o mundo. Morren por chegar a un acordo", declarou. Así mesmo, o mandatario negou que as fortes caídas da bolsa derivadas do plan arancelario fosen un obxectivo deliberado da administración. "Non podo dicirlles que pasará cos mercados", declarou Trump. "Non quero que nada baixe. Pero ás veces hai que tomar medicamentos para solucionar algo", agregou.

Trump abriu o pasado mércores unha guerra comercial co resto do mundo ao anunciar un arancel mínimo do 10 % para case todos os países que, nalgúns casos como A China ou a UE, é aínda maior. Desde entón, os mercados experimentaron caídas non vistas desde o inicio da pandemia da COVID-19, e os expertos advirten dunha posible recesión. Algúns países preparan medidas similares en represalia, mentres outros propuxeron retirar todos os aranceis aos Estados Unidos para propiciar unha negociación.

O primeiro ministro israelí Benjamin Netanyahu, cuxo país se viu afectado por aranceis do 17 %, reunirase o luns con Trump na Casa Branca e convértese no primeiro líder estranxeiro que o republicano recibe desde que anunciou os gravames.