Donald Trump gaña en Misuri, Míchigan e Idaho e achégase máis á candidatura

O expresidente estadounidense Donald Trump (2017-2021) proclamouse gañador dos caucus (asembleas locais) republicanos celebrados nos estados de Idaho, Misuri e Míchigan.

Trump impúxose á exgobernadora de Carolina do Sur, Nikki Haley, e suma unha nova vitoria no camiño para se converter no candidato republicano que acudirá ás eleccións presidenciais de novembro.

Deste xeito, Trump chega máis fortalecido ao supermartes, que se celebra o vindeiro 5 de marzo, cita clave na carreira presidencial, no que 16 estados celebrarán eleccións primarias.

Ata o de agora, Trump logrou vencer en todas as primarias e caucus que celebrou o Partido Republicano en estados como Iowa, Carolina do Sur ou Nevada.

Cada un destes procesos internos ten asignado un número proporcional de delegados, encargados de nomear o candidato en xullo, na Convención Nacional do Partido Republicano en Milwaukee.

En total hai 2.429 delegados dispoñibles e un candidato debe gañar polo menos 1.215 para asegurar o nomeamento. Polo momento, Trump ten acumulados 244, segundo un reconto do diario The Washington Post actualizado este domingo, e Haley suma 24.

Malia e todo, a exrepresentante dos Estados Unidos ante a ONU continúa na carreira. O vindeiro martes están en xogo un total de 874 delegados.