Trump ordena a despregadura de 1.500 militares á fronteira con México

O presidente dos Estados Unidos Donald Trump asinou este mércores unha orde executiva para despregar 1.500 militares na fronteira con México. Dá así o primeiro paso para cumprir a súa promesa de "pechar" o paso de migrantes e reforzar a seguridade fronteiriza.

A portavoz da Casa Branca Karoline Leavitt explicou en declaracións aos xornalistas que Trump asinara unha orde executiva para a despregadura de 1.500 militares. "Isto é algo polo que Trump fixo campaña. O pobo estadounidense estaba a esperar un momento como este, no que o Departamento de Defensa tome en serio a seguridade nacional. É unha prioridade número un para o pobo estadounidense, e o presidente xa cumpriu", afirmou.

Eses 1.500 efectivos sumaranse aos 2.200 militares en activo e os 4.500 reservistas da Garda Nacional de Texas que xa están despregados na fronteira. Segundo explicou a CNN, as novas tropas desempeñarán funcións similares ás dos efectivos xa presentes, enfocadas en apoiar a Oficina de Aduanas e Protección Fronteiriza (CBP, en inglés) con labores loxísticos e administrativos, como o mantemento de vehículos e a entrada de datos.

Durante o seu primeiro mandato (2017-2021), Trump xa ordenou o envío de 5.200 efectivos á fronteira con México. Este luns, horas despois de asumir novamente a presidencia, asinou unha orde executiva que instrúe o Pentágono para mobilizar as tropas necesarias para lograr un "control operativo completo da fronteira sur dos Estados Unidos".

A orde tamén establece que Trump avaliará nos próximos 90 días a posibilidade de invocar a Lei de Insurrección de 1807, o que permitiría que os militares asuman funcións de aplicación da lei dentro do país, nun rol máis próximo ao que actualmente desempeñan as forzas de seguridade.

Actualmente, os efectivos despregados na fronteira non teñen autorización para realizar tarefas policiais, como arrestar migrantes ou incautarse de drogas. Nos Estados Unidos, leis como a Posse Comitatus de 1878 prohiben ás forzas armadas actuar como policía en territorio nacional.