Trump, o home do saco, por Venancio Salcines

Donald Trump é un político de trazo groso, sabe a onde quere chegar, o que non sabe son todos os matices do problema. Onte pensou que España era un país en vías de desenvolvemento, unha nación pertencente ao bloque dos BRICS. A nosa economía está tan lonxe da que caracteriza as nacións emerxentes que só cabe pensar que Trump se equivocou.

O que si que é certo é que o presidente quere xerar unha barreira arancelaria que protexa a economía norteamericana. Pero este cinto ten unha lóxica e uns destinatarios, os seus votantes do chamado cinto de óxido, o rust belt. Unha área marcada pola desindustrialización que engloba dez Estados do nordeste dos Estados Unidos, dende Nova York ata Minnesota. Esta área sufre os efectos da globalización e está inmersa  nunha decadencia demográfica e económica que marca o seu voto e as súas aspiracións.

Trump entende que a globalización beneficiou as multinacionais norteamericanas, pero non os seus traballadores, moitos votantes republicanos.

A súa política arancelaria intenta ir contra os chamados países fábrica, nacións que fabrican e viven de vender os seus produtos ao primeiro mundo, pero que rara vez mercan na primeira nación do mundo. Países cun claro superávit comercial, como México ou como outros, moitos deles partes relevantes do grupo dos BRICS, como O Brasil, A China ou A India. É evidente que quere cambiar as regras de xogo da globalización, a súa política arancelaria é o seu instrumento, será capaz? Está por ver; en todo caso, non é España o obxectivo das súas teimas. Aquí hai tempo que ninguén vén a deslocalizar a súa produción, xa non somos a fábrica de man barata de Europa.