Turquía opónse á adhesión de Suecia e Finlandia á OTAN
Turquía opónse á adhesión de Suecia e Finlandia á OTAN
Os Estados Unidos reaccionan con sorpresa ao rexeitamento de Erdogan, pero confían en poder negociar a súa postura
Ankara acusou en distintas ocasións a Suecia de apoiar a actividade das milicias kurdo-sirias
O presidente de Turquía, Recep Tayyip Erdogan, é contrario á adhesión de Suecia e Finlandia á OTAN, xa que considera que "Escandinavia é unha casa de invitados para o terrorismo" e lembrou o "erro" que supuxo o feito de que o seu país permitira a entrada de Grecia na Alianza Atlántica, polas tensións históricas que caracterizan a relación entre os dous países.
"Non temos unha opinión positiva", declarou o venres Erdogan en Istambul antes de criticar a Escandinavia como refuxio seguro para terroristas. Os plans expresos de Finlandia e os algo máis discretos de Suecia de unirse á OTAN topáronse co descontento do mandatario do país que ten o segundo maior exército da Alianza Atlántica.
O presidente turco non lles perdoou aos dous países que durante anos acolleran membros de organizacións que Ankara considera "terroristas", en especial a guerrilla kurdo-turca PKK e a confraría do predicador Fetullah Gülen.
Os Estados Unidos reaccionaron con indisimulada sopresa ao rexeitamento de Turquía á entrada de Suecia e Finlandia na OTAN que, por riba, chega cando o seu secretario de Estado está a piques de viaxar a Europa para participar nun consello de ministros de Exteriores informal da organización, en que os dous países nórdicos estarán presentes.
A entrada de membros novos na Alianza require a aprobación por consenso dos 30 países integrantes. A oposición turca pode obstaculizar un eventual proceso de ampliación nun momento crucial.
