Ucraína denuncia novos ataques rusos con "máis de cen mísiles" e drons

As autoridades ucraínas denunciaron este xoves unha nova vaga de ataques rusos con "máis de cen mísiles" e drons. Ucraína de momento non achegou información sobre as vítimas.

A Forza Aérea Ucraína afirma que Moscova está disparando mísiles de cruceiro "desde varias direccións". 

"Tras o ataque nocturno dos drons kamikaze, o inimigo está a atacar Ucraína desde varias direccións con mísiles de cruceiro aéreos e marítimos de avións e barcos estratéxicos. Ademais, hai unha grande actividade da aviación táctica dos ocupantes", di a mensaxe da forza aérea, reproducida pola axencia de noticias Ukrinform.

"Máis de cen mísiles en ondas múltiples", dixo tamén o asesor da Presidencia ucraína Oleksiy Arestovich nunha mensaxe na súa conta da rede social Twitter. "Os sistemas de defensa aérea funcionan", escribe, e despois pídelle á poboación que non publique fotografías dos lugares alcanzados.

Outro asesor da presidencia ucraína, Mijalo Podoliak, elevou a "máis de 120" os mísiles disparados polas forzas rusas e salientou que o obxectivo é "destruír infraestrutura crítica e matar civís en masa".

Tamén publicaron mensaxes nas súas redes sociais os alcaldes de Kíiv, Leópolis e Kharkov dando conta do impacto de proxectís nas súas respectivas cidades.

O xefe da administración militar da rexión ucraína de Mykolaiv, Vitaly Kim, informou nunha mensaxe en Telegram do derrubamento por parte do exército ucraíno de cinco mísiles rusos sobre o Mar Negro. "Derrubamos tres mísiles sobre o mar", relatou nun primeiro momento, para despois engadir "outros dous menos".

Segundo Ucraína, estes dispositivos serían os drons kamikaze Shahed de fabricación iraniana, afirmacións que nega Teherán.

A principios desta semana, o xefe das Forzas Armadas iranianas, Mohamad Hosein Baqeri, cualificou de "guerra psicolóxica" as acusacións de supostamente enviar drons a Rusia para o seu uso no marco da invasión de Ucraína.

Belarús denuncia a caída dun mísil ucraíno no seu territorio

A Presidencia belarusa denunciou este xoves a caída dun mísil antiaéreo ucraíno S-300 no seu territorio durante o bombardeo masivo ruso contra a infraestrutura civil de Ucraína.

"Hoxe, entre as 10:00 e a 11:00, detectouse a caída en territorio de Belarús dun mísil ucraíno S-300 procedente do territorio de Ucraína", informou o servizo de prensa do presidente, Alexandr Lukashenko.

Segundo as autoridades deste país, que están activamente implicadas na campaña militar rusa en Ucraína, "o presidente foi informado de inmediato da caída do mísil ucraíno".

Posteriormente o Ministerio de Defensa de Belarús recoñeceu na súa canle de Telegram que as súas baterías antiaéreas derrubaron o mísil ucraíno tras a súa entrada no espazo aéreo do país.

Minsk engadiu que "de momento non hai informacións sobre vítimas".