Un brasileiro vinculado a grupos de odio, presunto autor do intento de asasinato de Cristina Fernández

Fernando Andrés Sabag Montiel, un brasileiro de 35 anos, levaba 20 vivindo na Arxentina. Tiña antecedentes penais por posesión de armas, lucía tatuaxes neonazis e frecuentaba perfís de grupos de odio en Internet.

A policía atopou dúas caixas con balas na súa casa da localidade de San Martín. É a persoa que ás nove da pasada noite apuntou á cabeza da vicepresidenta Cristina Fernández cando saudaba as persoas que a agardaban na porta da súa casa.

O presidente arxentino, Alberto Fernández, explicou que "Cristina permanece con vida porque, por unha razón aínda non confirmada tecnicamente, a arma, que contaba con cinco balas, non se disparou pese a ser accionado o gatillo".

Alberto Fernández convocou este venres o seu gabinete a unha reunión de urxencia. "É o suceso  máis grave ocorrido desde que recuperamos a nosa democracia", dixo.

O Goberno arxentino decretou día non laborable para condenar a violencia e permitir as exhibicións de solidariedade coa vicepresidenta.

Cristina Fernández, a política máis influínte dun país que presidiu durante dúas lexislaturas, está inmersa nun proceso xudicial por corrupción.

O fiscal pide para ela doce anos de cadea, unha imputación que agravou aínda máis o clima de crispación que vive a sociedade arxentina, aínda que este venres toda a clase política se uniu para condenar o intento de magnicidio.

O suceso mereceu tamén a repulsa internacional, incluída a do Goberno español.