Estabilizado o incendio que calcinou 600 hectáreas entre Cataluña e Aragón
Estabilizado o incendio que calcinou 600 hectáreas entre Cataluña e Aragón
O forte vento propagou con rapidez as lapas e impediu a intervención dos medios aéreos
Máis de 600 hectáreas arderon ata o momento no incendio que queima desde o sábado á tarde a zona coñecida como a Franxa, o límite territorial entre as comunidades de Cataluña e Aragón e que avanza polo municipio de La Granja d'Escarp, en Lleida.
Segundo os Bombeiros da Generalitat, corenta dotacións terrestres traballaron durante a noite nas tarefas de extinción do lume, que avanzou axiña empuxado polo forte vento cara á masa boscosa situada no eixe Maials-Almatret.
As condicións impediron ata o momento a intervención dos medios aéreos pero agárdase que nas vindeiras horas dous helicópteros poidan incorporarse ao operativo. Esta mañá o incendio quedou estabilizado.
O lume iniciouse pouco despois das 16:00 horas nun transformador eléctrico do encoro de Mequinensa, en territorio aragonés, pero o vento empuxou as chamas en dirección ao termo municipal de La Granja d'Escarp.
A Dirección Xeral de Protección Civil activou a prealerta do plan INFOCAT por este lume no medio rural. A maioría da extensión queimada é terra de cultivo.
