Un turista italiano falece nun ataque na cidade irsaelí de Tel Aviv

Unha persoa morreu e outras sete quedaron feridas esta noite nun atropelo presuntamente intencionado en Tel Aviv. Todas eran turistas procedentes de Italia e do Reino Unido. O falecido é un home de nacionalidade italiana de 36 anos.

Segundo a Policía israelí, o condutor do vehículo atropelou varios peóns nunha avenida céntrica na área da fronte marítima de Tel Aviv ata que envorcou. Tras observar que tentaba coller unha arma, foi abatido.

O atacante era un home árabe-israelí de Kafer Qasem, unha localidade de maioría árabe no centro de Israel. 

Segundo ataque

O incidente sucede no medio dunha forte repunta da violencia na rexión en pleno mes sacro musulmán do Ramadán, e logo doutro ataque este venres que acabou coa vida de dúas mulleres israelís na Cisxordania ocupada.

Tras o atropelo de Tel Aviv, o primeiro ministro, Benjamin Netanyahu, convocou unidades de reserva da Policía de Fronteiras.

Ademais, Israel realizou esta madrugada varios ataques de represalia contra a Franxa de Gaza e o sur do Líbano, tras lanzaren foguetes os milicianos palestinos logo de días de enfrontamentos entre palestinos e forzas israelís na mesquita da o Aqsa de Xerusalén. 

O ano máis mortífero dende o 2000

Este 2023 foi o inicio de ano máis mortífero no marco do conflito palestino-israelí desde o 2000. No que vai de ano, faleceron 18 persoas en ataques palestinos ou árabes-israelís, e polo menos 92 palestinos morreron en incidentes violentos de distinta índole con Israel. 

No último ano, a cidade de Tel Aviv, unha zona liberal e máis ben illada da dinámica de conflito no resto da rexión, foi obxecto de varios ataques con vítimas mortais.