Un morto e 30 feridos en Tel Aviv tras bater un camión contra unha parada de autobús

Un israelí morreu e outra trintena de persoas resultaron feridas este domingo, cinco delas en estado grave, despois de que un camión batera contra unha parada de autobús preto dunha base de intelixencia militar en Glilot, ao norte de Tel Aviv, informou o servizo de emerxencias Magen David Adom (MDA) e a Policía israelí.

Un dos feridos faleceu esta tarde, informou un dos hospitais,  debido ás feridas sufridas durante o atropelo, sen dar máis detalles sobre a súa identidade.

"Unha investigación preliminar mostra que un autobús parou preto da estación para deixar aos pasaxeiros en Glilot, e nese momento chegou un camión" e bateu contra eles, detallou un comunicado policial, que di estar a investigar o suceso como un posible "ataque terrorista".

Entre os outros 30 feridos, segundo o MDA, hai ademais cinco máis en estado grave e outras cinco persoas en estado moderado e unha vintena en estado leve. Outras catro persoas padeceron ataques de ansiedade.

Voluntarios sanitarios do servizo de emerxencias United Hatzalah informaron que algunhas persoas permanecían debaixo do camión cando chegaron a socorrer.

"Algunhas delas foron rescatadas polos equipos de bombeiros en estado grave despois de quedar atrapadas debaixo do camión. Os membros da unidade de resposta a crise e psicotrauma de United Hatzalah tamén brindaron asistencia no lugar a varias persoas que sufriron un choque emocional", detallaron nun comunicado.

O suposto agresor foi abatido a tiros por civís presentes na zona. A prensa israelí identifícao como o cidadán árabe israelí Rami Nasralah Natour da cidade árabe de Kalansua, no centro de Israel.

A policía está a investigar se outros sospeitosos o axudaron no acto. No que vai de 2024, polo menos 34 persoas morreron nun total de vinte ataques perpetrados por palestinos en Israel ou preto de asentamentos ilegais en Cisxordania ocupada.12 eran uniformados e 22 civís, polo menos nove deles colonos.

O último ataque tivo lugar o pasado 15 de outubro, cando un axente de Policía israelí foi asasinado e catro civís resultaron feridos nun tiroteo preto dun intercambiador entre as cidades israelís de Yavne e Ashdod, segundo o MDA.