Un total de 120 detidos nas protestas contra a reforma xudicial en Israel
Un total de 120 detidos nas protestas contra a reforma xudicial en Israel
Segundo os manifestantes, a reforma xudicial do Goberno acaba coa separación de poderes e resta competencias á Xustiza
![](https://img-g24-crtvg.flumotion.com/prog24/2023/20230712/20230712Israel.png)
A xornada de protestas contra a reforma xudicial en Israel, na que milleiros de persoas se mobilizaron por todo o país, acabou con 120 detidos e máis de 13 persoas feridas leves en choques coas forzas de seguridade, segundo informaron hoxe os grupos organizadores das mobilizacións.
Onte á noite, en varias cidades rexistráronse as manifestacións máis multitudinarias do chamado Día de Resistencia contra o polémico plan que impulsa o Goberno de Benjamin Netanyahu, nunha xornada enteira de cortes de estradas, marchas ao longo de todo o país e unha gran protesta ante o Aeroporto Ben Gurion de Tel Aviv.
As mobilizacións nocturnas rexistráronse en urbes como Haifa, Beersheva e Xerusalén, mentres que a protesta máis multitudinaria, que reuniu decenas de miles de persoas, foi no centro de Tel Aviv, onde os manifestantes tentaron cortar a autoestrada que cruza polo centro da cidade, o cal provocou que a policía interviñese para evitalo usando tamén canóns de auga.
Durante o día, a policía arrestou decenas de persoas acusadas de "violar a orde pública", mentres colectivos antirreforma apelan a realizar accións de desobediencia civil, aínda que moitos manifestantes foron liberados pouco despois da súa detención.
Segundo os seus detractores, a reforma xudicial do Goberno, o máis dereitista da historia do país, acaba coa separación de poderes, resta competencias á Xustiza, quita atribucións á Corte Suprema e leva a Israel cara á autocracia.
![](https://img-g24-crtvg.flumotion.com/prog24/2023/20230712/20230712Israel2.png)