Multitudinaria concentración en Santiago denuncia a "emerxencia extrema" que vive o galego

A plataforma "Queremos Galego" logrou convocar este domingo en Compostela millleiros de persoas para poñer de manifesto a situación de "emerxencia lingüística extrema" que atravesa o galego e a súa perda de espazo como lingua de comunicación habitual en Galicia.

Baixo o lema da declaración "Unámonos polo galego", a multitude reunida na compostelá praza da Quintana, aos pés da catedral, reclamou un cambio no "rumbo" do uso social da lingua propia de Galicia.

Ao acto asistiron, entre outras persoas, a voceira nacional do BNG, Ana Pontón, e o secretario xeral do PSdeG, Xosé Ramón Gómez Besteiro. O presidente da Mesa pola Normalización Lingüística, Marcos Maceira, lembrou o informe do Instituto Galego de Estatística que revela, entre outros datos, que a poboación que fala sempre en castelán xa supera á que o fai en galego, ou que un terzo dos mozos menores de quince anos non saben falar a lingua da súa terra.

Maceira chamou a atención, en declaracións aos xornalistas, sobre o feito de que cada vez que a sociedade galega se mobilizou para tratar de repoñer a situación da súa lingua freouse o descenso no número de persoas que deixan de falar galego.

Criticou tamén o anuncio do Goberno galego sobre un gran Pacto pola lingua e no que o presidente da Mesa dixo que "non podemos ter ningunha confianza".

"Levan quince anos actuando en contra dos acordos establecidos no Parlamento galego", afirmou. Para reverter a difícil situación da lingua galega na sociedade Maceira avanzou tres propostas: constituír plenarios de Queremos Galego en toda a xeografía galega, "reafirmarse no compromiso" da sociedade coa súa lingua, e convocar de novo a sociedade a un novo acto o 23 de febreiro, Día de Rosalía de Castro, na praza do Obradoiro de Santiago de Compostela.

A voceira nacional do BNG, Ana Pontón, dixo que "hoxe é un día para reivindicar o orgullo de ter lingua propia" pero tamén "para denunciar que a lingua galega está nunha situación crítica". "Os quince anos de políticas galegófobas, de políticas contra o galego, están a poñer contra as cordas o futuro do noso idioma", dixo Pontón, aínda que recalcou que "é posible cambiar o rumbo se cambia a política que está a facer a Xunta, empezando por ese decreto, de plurilingüismo da vergoña que converteu o galego nunha lingua de segunda".

A política nacionalista lembrou ao Goberno presidido por Alfonso Rueda que é máis necesario ca nunca "aplicar o grande acordo ao redor da lingua que xa temos neste país, que é o Plan Xeral de Normalización Lingüística".

O secretario xeral dos socialistas galegos, Xosé Ramón Gómez Besteiro, acusou o presidente nacional do PP e expresidente da Xunta, Alberto Núñez Feijóo, e ao seu sucesor á fronte do Executivo autonómico, Alfonso Rueda, de "levar ao galego á situación en que se atopa agora", de "lingua minoritaria".

"Temos que aliarnos todos para cambiar a situación de emerxencia lingüística e facer que o galego volva recobrar o impulso como unha lingua que nos una a todos os galegos e galegas", afirmou.

O acto celebrado este domingo na praza da Quintana estivo conducido polo músico e activista Xurxo Souto e finalizou coa actuación do grupo Tanxugueiras.

Concentración en defensa do galego na Praza da Quintana en Santiago este domingo