Un tren descarrila en Foz, tras atropelar dous cabalos, sen causar danos persoais
Un tren descarrila en Foz, tras atropelar dous cabalos, sen causar danos persoais
No convoi, que cubría o traxecto entre Ribadeo e Ferrol, só viaxaban o maquinista e o interventor
Un tren de pasaxe descarrilou esta mañá en Foz tras atropelar dous cabalos á altura de Vilaronte. No momento do accidente, só viaxaban o maquinista e o interventor e non se rexistraron danos persoais. Os animais morreron no sinistro.
O convoi cubría o traxecto entre Ribadeo e Ferrol e a liña ferroviaria quedou cortada polo que se habilitou un transporte alternativo por estrada.
Segundo informa a Axencia Galega de Emerxencias, o persoal de Renfe contactou co 112 ás 7:40 horas e arestora tentan restablecer a circulación canto antes.
Os cabalos eran dun veciño de Vilacendoi, unha parroquia situada a sete quilómetros de distancia. O dono cre que os animais fuxían dalgún perigo.
Ata o lugar desprazáronse axentes da Garda Civil, persoal de ADIF, bombeiros de Barreiros, membros do GES de Cervo e voluntariado de Protección Civil de Foz.
A veciñanza asegura que os trens de FEVE teñen atropelado outros animais na zona, xa que as vías non teñen ningún tipo de peche na maior parte do seu percorrido.
