Unións Agrarias nega que os gandeiros sexan os culpables da perda de competitividade da industria

Roberto García afirmou que aínda que o prezo medio que perciben os gandeiros por quilo de leite foi entre xaneiro e agosto un 7 % superior á media europea, nos dez anos anteriores foi entre un 12 e un 6 % inferior.

"Que curioso que durante todos estes anos que cobramos un 10 % menos malia ser un país deficitario, a industria non tivo ningún problema... Que casualidade que a competitividade da industria española, que se limitou a gañar cartos só con meter líquido nun cartón e non se puxo a facer produtos con valor engadido, queira descargar a viabilidade económica sobre as explotacións gandeiras que son as que menos base territorial teñen, as que menos axudas reciben da UE e as que máis se modernizan".

O secretario xeral de Unións Agrarias acusa á FENIL de alterar os datos en base a súa política de prezos.

"É alterar o resultado para xustificar que no que vai de ano baixaran unilateralmente sen pactar cos gandeiros tres veces o prezo e están cebando a nova baixada de decembro".

A FENIL advertía que malia os prezos elevados que estaban pagando aos gandeiros non aumentaba a produción de leite. Para Roberto García, a cuestión está relacionada coa inflación e o incremento dos custos de produción.  

"Se está caendo a produción non é polos prezos actuais senón porque o incremento dos custos é moi superior".

"En países e comunidades como Galicia, onde temos o 50 % dos gandeiros de toda España e producimos o 40 % do leite, temos que frear esa sangría que supón que cada ano pechan 600 explotacións por falta de proxecto de futuro".