Ursula von der Leyen tende a man a socialistas e liberais para unha Europa forte

Europa esperta marcada pola forte suba das forzas da dereita radical en moitos países. Un ascenso que non se vai traducir en grandes cambios dentro da nova Eurocámara. O Partido Popular Europeo é claro vencedor destes comicios e a súa candidata, Ursula von der Leyen, aspira a revalidar o cargo de presidenta da Comisión Europea co apoio de socialistas e liberais.

"Temos que traballar xuntos como fixemos nos últimos cinco anos. Temos que construír unha maioría para unha Europa forte", reclama Ursula von der Leyen.

Con todo, a suba das forzas da dereita radical en países clave como Alemaña ou Francia ten consecuencias inmediatas. O rotundo triunfo de Marine Le Pen, en Francia, que dobra en apoios a formación de Macron, levou o presidente da República a convocar eleccións lexislativas anticipadas.

"Decidín disolver a Asemblea Nacional", avanza Emmanuel Macron, presidente da República francesa.

En Alemaña, os resultados supoñen un duro golpe para a coalición de esquerdas de Olaf Scholz, que pasa a ser a terceira forza no país. A formación radical, Alternativa para Alemaña, sitúase como segunda forza por detrás da dereita tradicional conservadora, que foi a ganadora das eleccións.

A dereita radical avanza tamén en Bélxica. A forte caída do Partido Liberal leva o primeiro ministro, Alexander de Croo,  a dimitir. Os ultranacionalistas conseguen tamén un resultado histórico en Austria co 27 % dos votos, por diante de populares e socialistas.

Con estes resultados, as negociacións para conformar os grupos políticos da Eurocámara comezarán de inmediato. O próximo 16 de xullo quedará constituído o novo Parlamento Europeo.