Vigo acende o seu Nadal para que "empece en todo o planeta"
Abel Caballero prende os once millóns de luces que van iluminar a cidade durante as festas
A Porta do Sol volveu ser o epicentro dun acto que seguiron unhas 9.000 persoas
A iluminación estará acesa nun horario limitado para lograr un aforro do 15 %
Ás sete da tarde, o alcalde de Vigo coordina unha conta atrás en inglés, español e galego a coro coa multitude entregada. Logo, preme o interruptor e acende os once millóns de luces cos que, segundo Abel Caballero, bota a andar "o Nadal no planeta".
O acto tivo lugar na Porta do Sol, cunha capacidade limitada para 9.000 persoas. Xunto ás autoridades, presidiu o evento unha grande árbore de máis de 35 metros de altura. Coa iluminación e coas mensaxes do rexedor chegou a euforia a Vigo.
Xa non hai restricións por mor da pandemia pero prodúcese en plena crise enerxética. Por iso limitarase o seu horario, unha hora menos ao día. Será de 18:30 da tarde a doce da noite, o que suporá un aforro do 15 %.
Estaban acreditados trinta medios de comunicación e sesenta xornalistas, que seguiron en directo o acendido máis internacional do planeta.
