Ursula von der Leyen, reelixida presidenta da Comisión Europea cinco anos máis

A presidenta da Comisión Europea Ursula von der Leyen obtivo este xoves a confianza do Parlamento Europeo para repetir no cargo durante cinco anos máis, grazas ao apoio de 401 eurodeputados nun hemiciclo de 720 escanos.

En 2019 conseguiu ser nomeada como a primeira muller presidenta da Comisión Europea pero por tan só nove votos de vantaxe.

A alemá reuniuse con todos os grupos salvo coa ultradereita, incluídos aqueles, como A Esquerda, que deixaron claro que non teñen intención de darlle o seu apoio. Tamén se reuniu con delegacións nacionais e ata con eurodeputados individuais, cun particular foco nos Verdes.

Von der Leyen anuncia un comisario exclusivo de Pesca e Océanos, un compromiso formulado en Galicia

No seu discurso como candidata a repetir como presidenta da Comisión Europea, Ursula von der Leyen prometeu este xoves a designación dun novo comisario dedicado exclusivamente a Pesca e Océanos se revalida no cargo, un aceno cara a Galicia, onde lanzou por primeira vez esa idea.

"Se son elixida para un segundo mandato, encargarei a un comisario de Pesca a tempo completo que garanta que a pesca siga sendo unha forma de vida sostible durante xeracións", dixo o pasado 1 de xuño Von der Leyen na Coruña, nun evento de campaña do Partido Popular Europeo en Galicia para as eleccións ao Parlamento Europeo.

No seu primeiro mandato (2019-2024), a pesca recaeu baixo a responsabilidade do comisario europeo de Medio, Océanos e Pesca, o lituano Virginijus Sinkevicius, que esta semana dimitiu do seu cargo para recoller a súa acta de eurodeputado de adscrición ecoloxista.

Este xoves a democratacristiá alemá relanzou ese compromiso formulado en Galicia.

"Designarei un comisario de Pesca e Océanos encargado de garantir que o sector siga sendo sostible, competitivo e resiliente, e mantendo a igualdade de condicións para a cadea pesqueira europea", sinala Von der Leyen nas súas directrices políticas para os próximos cinco anos.

Ese apoio explícito á pesca sustentarase tamén nun "pacto europeo sobre os océanos" que se centrará en "impulsar a economía azul e garantir o bo goberno e sustentabilidade dos nosos océanos en todas as súas dimensións". 

Von der Leyen pide a confianza do Parlamento Europeo

A presidenta da Comisión Europea, Ursula von der Leyen, pedira este xoves a confianza do Parlamento Europeo para revalidar o seu cargo á fronte do Executivo comunitario e advertiu de que Europa afronta agora "unha decisión clara que definirá o noso mundo no próximos cinco anos, pero tamén o noso lugar no mundo no próximos cincuenta".

A política alemá, que obtivo 401 votos (a maioría son 361 escanos) nun Parlamento Europeo de 720 membros, asegurou que pide a confianza dos eurodeputados porque chegou á política "para marcar a diferenza para toda a sociedade" e coas xeracións dos seus fillos e os seus netos.

"Estou convencida de que a versión de Europa tras o final da Segunda Guerra Mundial, con todas as súas imperfeccións e desigualdades, é aínda así a mellor versión da historia. Nunca quedarei parada mirando como a destrúen desde fóra ou desde dentro", dixo.

Von der Leyen declarouse preparada para liderar esa pelexa con todas as forzas democráticas do Parlamento Europeo e dixo que sempre rexeitará que se acepte a polarización extrema das nosas sociedades ou que os "demagogos e extremistas" destrúan o modo de vida europeo.

Un comisario para o Mediterráneo

Von der Leyen prometeu que un membro do seu futuro equipo será comisario polo Mediterráneo e terá unha ampla carteira de responsabilidades nesta rexión para reforzar as relacións coa veciñanza sur de Europa.

A proposta, que recolle nas súas guías políticas para o período 2024-2029, atribúe a este novo comisario tarefas de investimento e asociacións cos países que baña o Mediterráneo e traballar na súa estabilidade económica, creación de emprego, enerxía, seguridade, migración e outras áreas de interese común.

"O novo Pacto polo Mediterráneo redeseñará esta relación esencial e dará un sinal político claro nun mundo máis conflitivo e inestable", sinala o texto que Von der Leyen defendeu perante o Parlamento Europeo.

Este comisario, do que aínda non se coñecen nacionalidade ou identidade, traballaría en estreito contacto coa Alta Representante da Unión Europea para os Asuntos Exteriores e a Política de Seguridade, cargo para o que foi nomeada a estoniana Kaja Kallas.

Na beira leste do Mediterráneo, Von der Leyen quere que a UE manteña tamén un papel activo para a estabilidade e "participe en todos os esforzos diplomáticos para asegurar unha solución completa e xusta ao conflito en Gaza".

Bruxelas preparará un plan de apoio multianual á Autoridade Palestina e seguirá traballando por unha solución de dous Estados, sección clave dunha futura Estratexia para a UE e Oriente Medio que sentaría as bases do "día posterior" á guerra en Gaza.

"Debemos facer todo o posible para deter a tráxica perda de vidas humanas. Isto significa traballar por un cesamento do fogo inmediato en Gaza, a liberación de todos os reféns e un aumento significativo e sostido do fluxo de axuda humanitaria a Gaza. Necesitamos un cesamento do fogo duradeiro e mirar máis aló", apuntan as guías.

Un plan europeo de "Vivenda Alcanzable"

A política alemá anunciou o nomeamento dun comisario europeo cuxas responsabilidades incluirán abordar a crise de vivenda e o primeiro Plan Europeo de Vivenda Alcanzable.

A presidenta asegurou que a Unión Europea debe "abordar urxentemente a crise de vivenda" que afecta a "millóns de familias e mozos", a pesar de que non ten competencias nestas políticas.

O plan europeo de vivenda e a carteira encomendada a un comisario europeo "abordará os factores estruturais, desenvolverá unha estratexia para a construción de vivendas, ofrecerá asistencia técnica ás cidades e Estados membros e centrarase no investimento".

Para iso, a nova Comisión, asegurou, traballará co Banco Europeo de Investimentos (BEI) nun "investimento paneuropeo" para vivendas alcanzables e sostibles a fin de atraer máis investimento público e privado.

Como primeira medida, a alemá propuxo inxectar liquidez no mercado permitindo aos países da UE duplicar os investimentos previstos da política de cohesión en vivendas alcanzables, e tamén revisar as normas sobre axudas estatais para apoiar a vivenda, en especial, para vivendas sociais de baixo consumo enerxético.

Un orzamento con menos programas e vinculado a reformas

Von der Leyen quere reformar o orzamento da Unión Europea para reducir o número de programas e incluír plans de cada un dos países con reformas "clave" que estarán vinculadas aos investimentos.

"Necesitamos un novo enfoque para un orzamento da UE moderno e reforzado", afirma o texto do seu guieiro político, en que Von der Leyen precisa que, de ser reelixida, presentará en 2025 unha proposta para reformar o Marco Financeiro Plurianual (MFP), que é o orzamento do bloque para cada período de sete anos, o próximo entre 2028 e 2034.

O respecto ao Estado de dereito, prosegue a presidenta da Comisión Europea, seguirá sendo vital para acceder aos fondos dun orzamento comunitario que tamén terá que mellorar a dotación dos programas para a acción exterior da UE e ter uns ingresos "reforzados e modernizados".

"O noso novo orzamento será reforzado, necesitamos máis capacidade de investimento. Debe estar máis centrado nas políticas, ser máis simple para os Estados membros e ter máis impacto para poder usar a súa potencia para mobilizar máis financiamento público e privado", resumiu Von der Leyen perante os eurodeputados.