Yolanda Díaz compromete novas subas do salario mínimo se se reedita o goberno de coalición
Yolanda Díaz compromete novas subas do salario mínimo se se reedita o goberno de coalición
A vicepresidenta segunda en funcións inaugurou o cumio europeo de traballo e diálogo social que se celebra en Santiago
Debaterase sobre a regulación do teletraballo, do dereito á desconexión ou da directiva do comité de empresa europeo
Arrancou en Santiago o cumio europeo de emprego, enmarcado dentro da presidencia española do Consello.
Os ministros europeos de Traballo traen na axenda a necesidade de reformar e impulsar a directiva do comité de empresa europeo, de regular o dereito á desconexión e ao teletraballo, ou de conseguir que a intelexencia artificial non anule os traballadores.
Tamén a mellora das retribucións. A vicepresidenta segunda en funcións comprometeu unha nova suba do salario mínimo en España se se reedita o goberno de coalición.
"O salario medio en España é de 1.500 euros, e é moi difícil vivir con 1.500 euros. Así que seguiremos facendo da política social a mellor ferramenta para cambiar a vida dos españois", di Yolanda Díaz.
Os representantes europeos abordarán con sindicatos e empresarios o reto da transición cara a un novo mercado laboral moito máis tecnolóxico e competitivo, onde o diálogo social se volve, din, imprescindible.
Nicolas Schmit, comisario europeo de Emprego, di: "A transición en que estamos traballando ten que ser unha transición xusta. Hai persoas que teñen que aprender novos empregos, pero nunca podemos deixalos abandonados".
O cumio continuará este venres con reunións bilaterais e mesas de traballo das que agardan que saian compromisos concretos para mellorar o futuro do emprego en Europa.
