Zelenski acusa a Rusia de "intentos illados de avanzar" durante a tregua pascual

O presidente ucraíno, Volodímir Zelenski, recoñeceu de xeito implícito que a tregua pascual declarada este sábado polo Kremlin se fixo efectiva en amplos segmentos da fronte, pero informou de numerosas violacións do cesamento do fogo por parte de Rusia.

O mandatario tamén denunciou intentos "illados" do inimigo de avanzar nalgúns puntos da zona de contacto.

"En xeral, nesta mañá de Pascua, podemos dicir que o Exército ruso está a tentar crear a impresión xeral dun cesamento do fogo, mentres nalgunhas zonas aínda continúa con intentos illados de avanzar e causar baixas a Ucraína", dixo Zelenski nas súas redes sociais tras recibir un novo informe do xefe do Exército ucraíno, Oleksandr Sirski.

Zelenski reafirmou que Ucraína baixará as armas onde o fixera tamén Rusia e insistiu na súa proposta formulada o sábado ao presidente ruso, Vladímir Putin, de estender a 30 días a tregua pascual declarada por Moscova desde as 15:00 horas do sábado ata a medianoite do domingo.

Segundo as informacións recibidas do Exército sobre a situación nas primeiras doce horas da tregua difundidas por Zelenski, Rusia atacou con artillería en 59 ocasións e lanzou 5 asaltos en diferentes segmentos da fronte, ademais de utilizar drons de ataque.

O presidente ucraíno denunciou que se produciron combates, como consecuencia destas accións, en varias zonas de Donetsk e nun punto da fronte de Zaporijia, ambas as dúas rexións de Ucraína parcialmente ocupadas por Rusia.

Do mesmo xeito, denunciou actividade de artillería e drons na rexión rusa de Kursk, onde as tropas ucraínas continúan levando a cabo unha operación militar.

"Entre as 18:00 (15:00 GMT e a hora na que empezaba a tregua) de onte e a medianoite de hoxe houbo 387 casos de lume de artillería e 19 asaltos das forzas rusas. Os drons foron utilizados polos rusos en 290 ocasións", escribiu o presidente ucraíno nas súas redes sen explicar a discrepancia coas cifras que dera noutra parte da súa mensaxe.

Zelenski remachou que o Exército ucraíno seguirá actuando "de forma simétrica(....), segundo a situación de combate específica" de cada zona.

Putin alegou "consideracións humanitarias" para declarar este breve cesamento do fogo durante a Pascua cristiá e católica. Porén, prodúcese horas despois de que o presidente dos EUA ameazara con abandonar a mediación se non se producían "avances nas negociacións".

Intercambio de soldados

A xornada do sábado estivo marcada ademais por un intercambio masivo de prisioneiros de guerra auspiciado, como en ocasións anteriores, polos Emiratos Árabes Unidos.

Segundo informou o Ministerio de Defensa ruso, o troco permitiu o retorno ao seu país de 246 soldados rusos que foran apresados polos ucraínos e de 15 prisioneiros de guerra feridos que necesitan axuda médica "urxente".

Co intercambio, Ucraína logrou o retorno de 277 prisioneiros de guerra que estaban en cativerio ruso, segundo anunciou Zelenski, quen cifrou en máis de 4.500 o número total de militares e civís que volveron a territorio ucraíno, desde o comezo da guerra e grazas a este tipo de trocos.

A liberación de todos os prisioneiros de guerra de ambos os dous bandos e dos civís e menores ucraínos detidos e deportados por Rusia é unha das propostas formuladas por Zelenski para crear confianza entre as partes, para unhas negociacións directas que poñan fin á guerra.