A UE espera pechar un acordo sobre regras fiscais nos "próximos días"

A vicepresidenta de Asuntos Económicos española, Nadia Calviño, descartou que os países da Unión Europea vaian pechar este venres un acordo sobre as novas regras de control do déficit e a débeda e confiou en que poidan logralo nos "próximos días" despois de que a negociación celebrada onte á noite permitise lograr "progresos moi significativos".

Así o confirmou tamén o comisario Europeo de Asuntos Económicos e Monetarios, o Italiano Paolo Gentiloni, quen este venres á mañá á súa chegada á reunión de ministros de Economía e Finanzas da UE dicía que "estamos próximos a un acordo, pero queda traballar nos próximos días porque o equilibrio que é preciso entre a estabilidade e o espazo para o crecemento se manteña". "Son optimista", concluíu.

"Estamos case aí", dixo Calviño, quen dirixe as negociacións en nome da presidencia española. "A pasada noite non foi posible finalizar todas as consultas pendentes de natureza técnica, política e legal, pero esperamos que sexa finalizado nos próximos días".

Se é necesario, engadiu a vicepresidenta española, convocarase unha reunión extraordinaria dos titulares económicos dos Vinte e sete (Ecofin) para pechar o acordo antes de final de ano que, segundo precisou, tería lugar despois do cume de xefes de Estado e de Goberno da UE que se celebra os próximos 14 e 15 de decembro.