Aparece varado nunha praia de Muros un veleiro que naufragou en augas dos EUA
Aparece varado nunha praia de Muros un veleiro que naufragou en augas dos EUA
O barco, un catamarán eslovaco, naufragou hai semanas en augas norteamericanas e o seu único tripulante foi rescatado despois preto dos Azores
Un veleiro eslovaco apareceu no mediodía deste xoves varado na praia de Area Maior, no concello de Muros.
Trátase dun barco cuxo tripulante foi rescatado tras o seu naufraxio nos Estados Unidos, segundo trasladou o GES de Muros, que desprazou este xoves varios dos seus efectivos para inspeccionar o veleiro, no que se conservan aveños persoais da tripulación.
Segundo parece, tras o naufraxio, e a voz de alarma do seu tripulante, o veleiro quedou sen goberno. Finalmente o ocupante foi rescatado á altura dos Azores por un equipo de salvamento do Canadá, logo de que tamén o intentasen os estadounidenses e os portugueses.
Un veciño que paseaba polo areal muradán deu a voz de aviso no mediodía deste xoves. As primeiras hipóteses apuntan a que o barco estivo ao pairo durante semanas ata tocar terra na costa galega empuxado polos temporais costeiros que se suceden no litoral durante as últimas xornadas.
Axentes da Garda Civil inspeccionaron o interior na busca de documentación e deixaron o barco precintado. Agora están á espera da decisión que tomen as autoridades sobre o seu traslado, xa que o catamarán, de grandes dimensións, é complicado que poida ser movido por terra.
