O presidente de Portugal anuncia o adianto das eleccións ao 10 de marzo

O presidente de Portugal Marcelo Rebelo de Sousa anunciou este xoves que disolverá o Parlamento e convocará eleccións anticipadas o día 10 de marzo para saír da crise política aberta coa dimisión do primeiro ministro, o socialista António Costa.

"Opto pola disolución da Asemblea da República e a convocatoria de eleccións o 10 de marzo de 2024", dixo Rebelo de Sousa.

O presidente explicou que optou por comicios anticipados por "decisión propia", ao considerar que a vitoria socialista de 2022 foi personalizada na figura do propio Costa, e manter os socialistas gobernando con outro primeiro ministro sería unha alternativa máis "débil".

Ademais, explicou que formalizará a súa decisión en decembro, despois de que se aprobou o Orzamento de 2024, para garantir "a indispensable estabilidade económica e social" no país e continuar a execución dos fondos do Plan de Recuperación e Resiliencia.

Tamén quere deixar tempo ao Partido Socialista para designar un novo líder. O xefe do Estado agradeceu a Costa o seu labor á fronte do Goberno, con momentos complicados como a pandemia ou as guerras en Ucraína e Oriente Próximo, e sinalou que desexa que se aclare o caso xudicial que o levou a dimitir.

"Espero que o tempo, máis pronto que tarde, permita esclarecer o ocorrido, no respecto da presunción de inocencia, a salvagarda do bo nome, a afirmación da xustiza e o reforzo do Estado de dereito democrático", apuntou.

 

O presidente falou ao país tras unha reunión do Consello de Estado de máis de catro horas, que se mostrou contrario á disolución, segundo desvelou. Este organismo consultivo está integrado polo propio primeiro ministro, os ex-xefes de Estado e os presidentes da Asemblea da República, dos Gobernos autónomos de Madeira e Azores e do Tribunal Constitucional, e tamén pola Defensora do Pobo e cinco membros designados por Rebelo de Sousa e outros cinco polo Parlamento.

Costa presentou a súa dimisión o pasado martes tras coñecerse que é investigado nun caso de prevaricación, corrupción activa e pasiva e tráfico de influencias en negocios de litio e hidróxeno, aínda que asegurou que non cometeu ningún acto ilícito.

Nove citas electorais anticipadas

Desde que se instaurou a democracia en 1974, tras a caída da ditadura encabezada por António de Oliveira Salazar, Portugal celebrou dezaseis eleccións lexislativas, das que a metade foron adiantos electorais.

En 2022 foron as últimas eleccións anticipadas. O socialista Costa, que gobernaba en minoría na súa segunda lexislatura, non conseguiu sacar adiante o orzamento para 2022 e o presidente Rebelo de Sousa disolveu o Parlamento e convocou comicios. Costa gañou con maioría absoluta.