A Coruña énchese de celebridades para inaugurar a exposición de Helmut Newton

A exposición sobre o fotógrafo do erotismo e a moda Helmut Newton que se inaugura este sábado na Coruña, promovida pola Fundación Marta Ortega Pérez, reuniu nunha festa a modelos como Karen Elson, Kristen McMenamy, Jon Kortajarena, Simon Le Bon ou Eugenia Silva

📸 A CORUÑA
Estas son algunhas das celebridades do mundo da moda e da arte internacional que asistiron á velada de Marta Ortega. Inaugurábase unha exposición dedicada ao fotógrafo Helmut Newton
Máis info 👉🏻 https://t.co/skMwxb7ZvF pic.twitter.com/dazsQeb8lw

— G24 (@G24Noticias) November 16, 2023

O traballo do fotógrafo australiano de orixe alemá Helmut Newton (Berlín, 1920-Os Ánxeles, 2004), imprescindible de cabeceiras como Vogue ou Elle, é o terceiro que se exhibe no espazo portuario Peirao de Batería na Coruña, tras as mostras dedicadas a Peter Lindbergh e Steven Meisel que promove a Fundación Marta Ortega Pérez (MOP).

Previa á inauguración oficial da mostra 'Helmut Newton-Fact &Fiction' celebrouse unha festa na noite deste mércores amenizada polo DJ Paul Sevigny e unha cea a cargo do chef Javi Olleros, con dúas estrelas Michelin, á que acudiron grandes nomes da moda, o cinema e a arte protagonistas dos retratos máis coñecidos de Newton.

Ademais de Marta Ortega, presidenta de Inditex, estiveron presentes a actriz británica Charlotte Rampling, á que en 1974 retratou espida no Grand Hôtel Nord Pinus en Arles; a modelo francesa e directora de cinema Marie Sophie Wilson Carr; Malgosia Bela, Kristen McMenamy, Nikolai von Bismarck.

Convidados aos que tamén se sumaron Fabien Baron, Vincent Van Duysen, Simon Le Bon, Jon Kortajarena, Michel Gaubert, Alexandre de Betak, Carlyne Cerf de Dudzeele, Cedric Charbit, Craig McDean, Philippe Garner, Matthias Harder e Tim Jefferies.

A selección de fotografías do coñecido como fotógrafo do erotismo que se exhiben son "unha boa mostra da linguaxe visual audaz, apoderador e sen complexos característico de Newton", incluídos os seus icónicos "grandes espidos", explicou MOP.

Retratos de personaxes como Andy Warhol, David Bowie, Margaret Thatcher, Charlotte Rampling, Elsa Peretti, Daryl Hannah, Jerry Hall, Naomi Campbell, Yves Saint Laurent e Karl Lagerfeld colgan xa das paredes do Peirao da Batería.

Como contrapunto ás súas imaxes máis icónicas, a exposición inclúe aspectos menos coñecidos da súa obra como fotografías que cidades que influíron na súa carreira de París, O Ánxeles, Montecarlo a Berlín, Viena ou Las Vegas.

A exposición impulsada xunto coa Fundación Helmut Newton foi comisariada por Philippe Garner, experto en fotografía, deseño e artes decorativas do século XX, ademais de polo vicepresidente da Fundación Helmut Newton, Matthias Harder e o director da Galería Hamiltons, Tim Jefferies.

A exposición tamén aborda a faceta persoal do artista a través dunha serie de vídeos que mostran como traballaba e conversaba xunto a imaxes persoais que ofrecen unha visión da súa infancia, a súa carreira e a súa relación coa súa esposa June e doutros documentos como carteis, cámaras e equipos, accesorios, obxectos curiosos e recordos.

Newton soubo combinar o seu traballo para revistas de moda e música -a súa lente retratou a Madonna, os INXS ou Cindy Lauper-, con encargos comerciais, con ironía considerábase "a gun for hire" (un pistoleiro a soldo).

Anna Wintour, a soada editora de Vogue, aseguraba que as súas fotos daban valor á revista. "Era icónico, perturbador, incitábate a pensar".

A exposición estará aberta de maneira gratuíta do 18 de novembro ao 1 de maio de 2024.