Albares defende o "retorno efectivo" da Autoridade Palestina a Gaza en lugar de Hamas

O ministro español de Asuntos Exteriores, José Manuel Albares, reivindicou este luns o "retorno efectivo" da Autoridade Palestina a Gaza, en lugar de Hamas, que non pode ser un "socio para a paz" en Oriente Medio.

Así o sostivo na apertura do Foro Rexional da Unión polo Mediterráneo, que se celebra no Recinto Modernista de Sant Pau, en Barcelona, para analizar a situación en Oriente Medio e, en concreto, a guerra en Gaza.

O Foro reúne representantes dos 43 Estados membros da Unión polo Mediterráneo (UpM) e está copresidido por Josep Borrell, alto representante da Unión Europea para Asuntos Exteriores e vicepresidente da Comisión Europea, e por Ayman Safadi, viceprimeiro ministro e ministro de Asuntos Exteriores e Expatriados de Xordania.

Albares é o anfitrión deste encontro, en que tamén participan o secretario xeral da UpM, Nasser Kamel, e o ministro de Asuntos Exteriores de Arabia Saudita, príncipe Faisal bin Farhan, en representación do Comité Ministerial Árabe-Islámico.

Na súa intervención de apertura, Albares apostou por "ofrecer todo o apoio -europeo, árabe, internacional- para acompañar e facer posible o restablecemento da autoridade lexítima en Gaza".

"A Autoridade Palestina é o noso único socio posible para a paz", subliñou Albares, tras a polémica dos últimos días por mor da acusación de Israel ao presidente do Goberno español, Pedro Sánchez, de "apoio ao terrorismo" de Hamas.

Albares avogou por "materializar dunha vez por todas a solución de dous estados", co establecemento dun Estado palestino xunto ao Estado de Israel", e "é con este obxectivo que España propuxo convocar canto antes unha conferencia internacional de paz coas partes".

Para o ministro, "Hamas non pode ser quen lidere Gaza", porque "non ten unha axenda de coexistencia en paz" e "non pode ter un papel no futuro na implantación da solución de dous Estados", polo que hai que potenciar que a Autoridade Palestina, que si "é un socio para a paz", ocupe o seu lugar.

O ministro urxiu á comunidade internacional a "non perder máis tempo" e a traballar por un acordo que permita "garantir a paz e seguridade en toda a rexión".

"De Barcelona debe saír unha mensaxe de esperanza e de paz", sinalou Albares, que describiu a cidade como "a capital política e diplomática do Mediterráneo" na xornada de hoxe.

Condena a Hamas

Albares recalcou que "España condenou a Hamas, porque demostrou que só sabe destruír", como se puxo de manifesto co seu ataque do 7 de outubro, cando "Israel sufriu o peor atentado terrorista da súa historia".

As vítimas desta "barbarie terrorista", que acabou coa vida de dous españois, teñen "toda a solidariedade de España, dixo Albares, que pediu estender un "cesamento do fogo humanitario" e esixiu a Israel que "respecte escrupulosamente o dereito internacional humanitario".

"A morte de decenas de miles de palestinos inocentes non é aceptable", denunciou Albares, que reclamou unha solución que "esta vez debe ser definitiva".

Apoio á "solución de dous estados"

Pola súa banda, o secretario xeral da UpM, Nasser Kamel, defendeu así mesmo a "solución de dous estados" e condenou tanto o ataque de Hamas do 7 de outubro como o "castigo colectivo" de Israel á poboación palestina.

Nesta mesma liña expresouse o príncipe saudita Faisal bin Farhan, que pediu a "fin das operacións militares" e propuxo "avanzar cara a un plan serio e crible de paz" que pase pola "solución de dous Estados".

Ás portas do Recinto Modernista de Sant Pau, concentráronse desde antes das nove da mañá unha trintena de persoas baixo a lema "Cesamento do fogo permanente", con bandeiras palestinas e berros de "Palestina Libre" e "Boicot a Israel".

Borrell: "Non haberá paz e seguridade para Israel sen un Estado palestino"

O alto representante da Unión Europea para Asuntos Exteriores e Política de Seguridade, Josep Borrell, defendeu este luns que "non haberá paz e seguridade para Israel sen un Estado palestino" e tamén apostou polo retorno dunha "revitalizada" Autoridade Nacional Palestina en Gaza.

No seu discurso durante a inauguración do foro, Borrell, que lamentou que Israel non tome parte na reunión, subliñou que o país hebreo ten o seu lugar na UpM, confiou en que volverá participar nela e dixo ser consciente dos "traumas e rabia" que hai na rexión.

Respecto diso, condenou a "brutalidade inxustificada de Hamas" sobre civís do pasado 7 de outubro, pero criticou tamén a resposta "desproporcionada" de Israel, remarcando que "un horror non pode xustificar a outro horror".

Ante a actual tregua de catro días que termina este luns, Borrell chamou a "estender" e "facer máis sostible" o alto ao fogo, mentres se traballa para unha solución política que permita "romper o círculo da violencia para sempre".

"Canto máis permitamos aos extremistas marcar a axenda, máis extremismo se vai esparexer, non só na rexión, senón que tamén afectará a Europa", advertiu Borrell, que criticou aos colonos israelís en Cisxordania.

"A violencia propagada polos colonos extremistas en Cisxordania, moitas veces protexidos pola policía e o exército israelí, non fai a Israel máis seguro", aseverou.

O alto representante da Unión Europea para Asuntos Exteriores salientou que "ningún exército pode garantir a seguridade mellor que a paz", e sostivo que esta só chegará coa solución dos dous Estados.

"Un Estado palestino en Gaza, Cisxordania e Xerusalén Este é a mellor e única garantía dunha seguridade a longo prazo para Israel. Non haberá paz e seguridade para Israel sen un Estado palestino", afirmou Borrell, que asegurou que para combater a ideoloxía de Hamas "os palestinos necesitan perspectiva política crible para a creación dun Estado baseada en parámetros internacionais".

Neste sentido, instou a poñerse de acordo para evitar o retorno de Hamas en Gaza, o desmembramento e a colonización de Gaza por parte de Israel e acabar coa "colonización ilegal" de Cisxordania, "unha fonte importante de tensións e un dos obstáculos para resolver o conflito".

Ademais, defendeu que "a solución pasa polo regreso dunha revitalizada Autoridade Nacional Palestina (ANP) en Gaza" porque "un territorio sen Estado é un territorio que estará entregado ao caos, a violencia, o terrorismo e a migración".