"Nunca máis o autoritarismo", proclama Arévalo tras ser investido presidente de Guatemala

"Nunca máis o autoritarismo", proclamou hoxe o novo presidente de Guatemala, Bernardo Arévalo, nada máis ser investido xefe do Estado do país centroamericano para o período 2024-2028, tras un tormentoso proceso de transición en que o Ministerio Público e algúns xuíces e parlamentarios da Lexislatura que acaba de terminar tentaron impedir que asumise o cargo.

"O pobo de Guatemala demostrou a súa sabedoría, e institucións como a Corte de Constitucionalidade e o Tribunal Supremo Electoral protexeron o desexo soberano dos guatemaltecos de vivir en democracia", dixo no seu primeiro discurso o presidente.

Arévalo de León recibiu a banda presidencial de mans do presidente do Congreso Samuel Pérez Álvarez, elixido tamén para o cargo este domingo debido a que o mandatario saínte, Alejandro Giammattei, se ausentou da cerimonia argumentando que debía entregar o seu posto como moi tarde antes da medianoite do domingo e por iso enviou ao Congreso os símbolos institucionais por medio da súa secretaria. A sesión viviuse con tensión e altercados na rúa. 

Fundadores de Movimiento Semilla

Arévalo de León e Pérez Álvarez son dous dos fundadores de Movimiento Semilla, o partido nado das manifestacións contra a corrupción rexistradas no país centroamericano durante 2015, que culminaron coa caída do Goberno de Otto Pérez Molina (2012-2015), actualmente en prisión.

"É grazas aos mozos de Guatemala, que non perderon a esperanza, que hoxe podo falarlles neste podio", proclamou o académico e líder político, quen agradeceu aos pobos indíxenas defenderen a democracia de Guatemala.

Arévalo ingresou no Teatro Nacional Miguel Ángel Asturias, onde se desenvolveu a cerimonia de investidura, ao son do concerto para violín e orquestra A primavera, do compositor italiano Antonio Vivaldi.

"Nova primavera" e discurso anticorrupción

O presidente recentemente investido prometeu a chegada dunha "nova primavera", como a que protagonizou o Goberno do seu pai Juan José Arévalo Bermejo entre 1946 e 1951, nunha das Administracións de máis desenvolvemento para o país centroamericano.

Acompañado pola súa esposa Lucrecia Peinado, o presidente camiñou no medio do recinto teatral entre aplausos e sorrisos, a pesar das máis de dez horas de atraso da cerimonia pola constitución do Congreso, que finalmente se levou a cabo na madrugada do 15 de xaneiro aínda que a lei establece que debe realizarse o 14 de xaneiro.

Desde que obtivera o segundo posto na primeira volta das eleccións presidenciais, Arévalo de León e o Movimiento Semilla foron perseguidos polo Ministerio Público (Fiscalía) e polos maxistrados do Tribunal Supremo Electoral co obxectivo de reverter a súa vitoria nas urnas.

O novo gobernante chega ao poder cun discurso anticorrupción, do mesmo xeito que o seu partido, nacido precisamente das manifestacións de 2015 que deron paso á caída do presidente Otto Pérez Molina. 

Á toma de posesión asistiron o rei Filipe VI e o ministro de Exteriores José Manuel Albares en representación de España.