O labirinto de Breoghán, un lugar para perderse en Vilarmaior
O labirinto de Breoghán, un lugar para perderse en Vilarmaior
Con máis de dous quilómetros de corredores, é o labirinto vexetal máis grande de España
Será, sen dúbida, un grande atractivo turístico. Nunha superficie de máis de seis mil metros cadrados, catro mil árbores debuxan unha enorme cruz celta vexetal na que perderse. O labirinto de Breoghán abriu as súas portas para convidarnos a regresar ás orixes e reconectar coa terra percorrendo dous quilómetros e medio de corredores sinuosos.
Cinco anos lle levou a José Luís Meitín facer realidade este proxecto, encaixado nunha contorna rural e moi conectado co Roteiro dos Petróglifos de Vilarmaior. O labirinto está deseñado para saír nun tempo de entre media hora e corenta minutos. Para os máis desorientados, hai un número de teléfono ao que chamar para guialos ata a saída.
A entrada custa entre tres e cinco euros e é de balde para os menores de sete anos. Entre as recomendacións, calzado cómodo, gorra, protección solar e, por suposto, respecto pola contorna.
