2025 comeza con frío, churros e ganas de seguir de festa
2025 comeza con frío, churros e ganas de seguir de festa
A noite máis longa deixou paso a unha mañá en que moitos repoñían forzas para poder continuar coa celebración
As primeiras horas de 2025, que comezou en Galicia con moito frío, deixaron imaxes de celebracións que aínda se alongaban ata ben entrada a mañá.
Nas churrerías de moitas cidades e vilas coincidían os que despiden a noite co chocolate quente cos que madrugaron neste primeiro día do ano.
Comidas as uvas da sorte, arrancou a festa rachada polas rúas do país. E como cada Noitevella, elegancia e ganas de xolda conxugáronse nestas primeiras horas do ano ás portas de pubs e discotecas.
Xa dentro dos locais, máis temperados, música a tope para despedir por todo o alto o ano que acaba e recibir o que chega.
Para gozar as cousas boas da vida, nada mellor que comezar o ano con moito baile, moito humor e moita risa compartida. E claro, non esquecerse de inmortalizar cada momento por se a memoria falla nalgún momento.
Avanzada a madrugada, e esgotadas as forzas tras horas de troula, a seguinte cita era cos churros e co chocolate quente para temperar o corpo, tras unha noite moi fría en que os termómetros baixaron de cero en boa parte de Galicia.
Para moitos, este primeiro día será para descansar, recuperarse dos excesos nocturnos e ir maquinando nos propósitos para este novo ano.
