Algúns xoguetes están esgotados desde hai semanas
Algúns xoguetes están esgotados desde hai semanas
Nas xogueterías atendían esta tarde pedidos de última hora
Moitas tendas de agasallos estarán abertas o domingo
As xogueterías do país atenden os pedidos das cartas aos Reis Magos que chegaron máis atrasadas. Pero completar a lista de agasallos nalgúns casos xa vai ser imposible. Entre o apalpador e o Papá Noel acabaron coas existencias dalgúns xoguetes concretos.
"Si, hai moitas cousas que se esgotaron no Nadal e que puidemos repoñer para Reis, pero cos de máis éxito foinos imposible. O xogo de construción de Nano Crafs e a caixa forte de Vtech", di Manuel Villar.
Entre os máis solicitados tamén hai algúns clásicos que facilitan acertar na elección.
"O que teñen os de Playmobil ou Lego é que tampouco buscan algo moi concreto e se non hai o que están pedindo, si que hai outras posibilidades porque son compatibles".
"Estase volvendo ao xoguete tradicional para o neno pequeno, pídese moito xoguete de madeira", di Manuel Villar.
Negocios coma este de Santiago viven nestes días o momento de maior actividade. A compra media supera os 30 euros por cliente.
"Eu escribín, si, para min e para os netos".
"Eu leo as cartas e intento facer a elección dos agasallos".
"Eu pedín un boneco, unha cadeira gaming".
"Hai cousas que son complicadas de atopar e que hai que preguntar en varios lugares, dar as indicacións concretas para que as atopen", contan varias persoas.
"Que me traian todo o que pedín", di un neno.
O que é seguro é que o cariño e a ilusión que contén cada paquete farao chegar ao seu destino xusto a tempo.
