300 maiores comparten xuntos estas festas dentro do programa Xuntos polo Nadal

O presidente da Xunta, Alfonso Rueda, e a conselleira de Política Social e Xuventude, Fabiola García, visitaron este mércores a residencia de Tempo Libre de Panxón, en Nigrán, con motivo da campaña Xuntos polo Nadal.

Esta iniciativa autonómica ofrece o aloxamento en réxime de pensión completa desde o día 24 de decembro ata o día 7 de xaneiro para maiores de 60 anos.

A convocatoria de 2023 contou con 270 prazas repartidas entre as dúas residencias de tempo libre coas que conta a Consellería de Política Social e Xuventude, en Nigrán e O Carballiño.

"Estes días tan especiais non se poden pasar sós. É importante que estean xuntos e o importante é que o pasen ben e gocen. Despois de todo o que deron na súa vida, agora teñen todo o dereito a que devolver e esta é unha pequena mostra", dixo Rueda aos usuarios deste servizo.

O presidente autonómico asegurou que estas visitas e ver que "o están pasando ben" lle cargan as "pilas".

Os beneficiarios deben ter máis de 60 anos, estar empadroados nalgún concello galego, vivir sós no seu domicilio e pasar sen compaña as datas do Nadal, valerse en por si e non padecer unha enfermidade transmisible con risco de contaxio, nin trastornos mentais ou de conduta non compensados que poidan alterar a convivencia durante o transcurso da estadía.

O programa de actividades é variado e inclúe propostas como actuacións musicais, sesións de cinema, bailes, talleres, campionatos de cartas, excursións ou sesións de risoterapia e de ximnasia.