A Armada evacúa 162 civís europeos do Sudán, entre os que non hai españois

As Forzas Armadas españolas evacuaron este venres desde Sudán 162 civís de distintas nacionalidades, entre os que non hai españois, despois de que a Unión Europea solicitara apoio para a extracción dos seus nacionais do país, segundo informaron fontes do Ministerio de Defensa.

España respondeu a este pedimento co envío da fragata "Raíña Sofía", que estaba no océano Índico integrada na operación Atalanta e que trasladará os civís ata unha zona segura en Ieda, en Arabia Saudita.

As autoridades sauditas prestáronlle o seu apoio á delegación da Unión Europea para a evacuación de cidadáns de Sudán e comprometéronse a poñer todo o seu esforzo humano e económico para apoiar o traslado dos evacuados.

Esta é a segunda evacuación de civís desde Sudán realizada polas Forzas Armadas, que o 24 de abril sacaron de Khartum, a capital do Sudán, máis de 30 españois e outros 70 cidadáns europeos e latinoamericanos en avións do Exercito de Terra e do Aire.

Esta Operación de Evacuación de Persoal Non Combatente, NEO, polas súas siglas en inglés, iniciouse o venres 21 de abril co posicionamento no aeroporto de Djibuti dun primeiro avión A400, ao que se lle sumaron posteriormente un Airbus A330 e outros dous A400.

O actual conflito en Sudán enfronta desde o 5 de abril o Exército e os paramilitares das Forzas de Apoio Rápido, o que causou polo menos 550 mortos e decenas de miles de refuxiados.