A artista Noelia Aragundi embelece unha granxa de Paradela cun novo mural
Na mesma explotación leiteira xa traballara Diego As, cunha obra de arte urbana de gran formato
Un elemento importante hoxe en día nas explotacións gandeiras é a súa aparencia. A través dos traballos encargados aos artistas urbanos, conséguese darlles un toque innovador, como se pode apreciar na Gandería Faustino, na parroquia paradelense de Castro de Rei de Lemos. Se o gando vacún foi o protagonista do mural realizado por Diego As, o cabalar é o que está a plasmar Noelia Aragundi no interior da granxa.
"Fixen unha montaxe cun cabalo, que debía estar coas patas levantadas, e integrei unha cerca co logo da gandería nunha lona colgada, coma nun todo realista", explica a artista padronesa Noelia Aragundi.
"Como boto moitas horas na oficina, facendo a xestión da granxa e demais, que menos que facerlles unha pequena homenaxe nun mural. Fóra xa temos as vacas, e ao cabalo quería darlle ese pequeno espazo, xa que no meu día a día forma unha parte moi importante", sinala o gandeiro Diego González.
En 2022, con tan só 21 anos, o titular da explotación fora pioneiro na aposta polos murais de arte urbana. Mesmo antes de que Diego As fose un artista consagrado, encargáralle unha obra de 100 metros cadrados.
"Vin a parede moi grande, e probamos. Gustoume, gustoulle moito á xente, e decidín seguir na oficina. E a idea é seguir pouco a pouco", engade Diego.
En breve, prevese que o novo mural luza xa rematado, co fin de lle dar á granxa outro toque aínda máis colorido.
