A asociación maioritaria de fiscais planta o fiscal xeral por poñer en dúbida a súa indepedencia

A Asociación de Fiscais (AF) seguiu os pasos da Asociación Profesional Independente de Fiscais (Apif) ao anunciar que se levanta da mesa de negociación do novo Estatuto Orgánico do Ministerio Fiscal. Faino ante "as graves e inaceptables insinuacións" do fiscal xeral do Estado, Álvaro García Ortiz, "poñendo en dúbida a nosa profesionalidade e independencia", sinala nun comunicado.

En concreto, a AF refírese a "as manifestacións realizadas nos medios de comunicación polo fiscal xeral do Estado poñendo en dúbida a actuación independente e profesional das asociacións de xuíces e fiscais, acusándoas de estar politizadas e non respectando o traballo que realizan".

Por iso, a Asociación de Fiscais considera que "rompeu o marco idóneo e necesario para continuar os traballos asociativos conxuntos para a elaboración dun novo Estatuto Orgánico do Ministerio Fiscal" e, en consecuencia, "acorda levantarse da mesa" constituída para o efecto polo fiscal xeral do Estado.

A AF segue así os pasos da Asociación Profesional Independente de Fiscais, que, nunha carta dirixida ao fiscal xeral o pasado 16 de abril, asegurou que non tiña "máis remedio que comunicarlle que non vai participar no grupo de traballo" para a elaboración do Estatuto.

O motivo foi o "comportamento anómalo" de García Ortiz ante as querelas por revelación de segredos no caso da parella da presidenta da Comunidade de Madrid, Isabel Díaz Ayuso, cando nun acto asumiu a "responsabilidade última" da nota de prensa emitida para ese efecto.

García Ortiz propuxo o pasado 10 de abril ás tres asociacións de fiscais que comezasen os traballos para impulsar un novo Estatuto, en paralelo á futura a Lei de axuizamento criminal que quere activar o Ministerio de Xustiza. Hoxe, só queda na mesa a Unión Progresista de Fiscais.

O interese da Fiscalía Xeral por impulsar un novo Estatuto vai en paralelo á aposta do ministro da Presidencia, Xustiza e Relacións coas Cortes, Félix Bolaños, de dar o "impulso definitivo" a unha nova Lei de axuizamento criminal que atribúa a investigación dos delitos aos fiscais en substitución dos xuíces.