A carreira electoral apértase en tres cidades galegas a cen días dos comicios locais
A carreira electoral apértase en tres cidades galegas a cen días dos comicios locais
Segundo a enquisa de Sondaxe, seis das sete urbes manterían as alcaldías
A mostraxe só lle dá maioría absoluta a Abel Caballero e a José Manuel Rey
![](https://img-g24-crtvg.flumotion.com/prog24/2023/20230212/ENQUISA_VOZ_frame_0.png)
Seis das sete cidades galegas poderían manter os seus alcaldes e alcaldesas actuais tras as eleccións municipais de maio excepto Ferrol, a única na que se produciría un cambio de maiorías, segundo a enquisa de Sondaxe que publica este domingo La Voz de Galicia.
O PSdeG mantería A Coruña, Vigo, Santiago de Compostela e Lugo, aínda que nesta última o escenario está máis axustado.
O BNG retería Pontevedra, Democracia Ourensá vería outra vez un resultado similar ao que lle permitiu chegar á alcaldía de Ourense e o PPdeG podería obter a súa única cidade tras alcanzar a maioría absoluta en Ferrol.
Son os resultados dunha enquisa feita por Sondaxe con 400 entrevistas en cada unha das cidades entre os pasados 1 e 9 de febreiro.
Maioría absoluta en Vigo
En detalle, a enquisa prevé que, de celebrárense agora as eleccións municipais de maio, en Vigo o PSdeG de Abel Caballero obtería 19 concelleiros, polo que tería unha ampla maioría absoluta, con cinco edís de marxe.
![](https://img-g24-crtvg.flumotion.com/prog24/2023/20230212/ENQUISA_VOZ_frame_199.png)
Na Coruña, Inés Rey (PSdeG) podería repetir como alcaldesa como forza máis votada, ao superar ao PPdeG pero empatar con dez edís, a catro da maioría absoluta, pero sen necesidade dun pacto de investidura como en 2019.
![](https://img-g24-crtvg.flumotion.com/prog24/2023/20230212/ENQUISA_VOZ_frame_2550.png)
En Ourense, o exalcalde Manuel Cabezas (PPdeG) daría ao seu grupo dous concelleiros máis que fai catro anos, ata nove, e sería a forza máis votada, empatada co PSdeG doutro exalcalde, Paco Rodríguez.
Con todo, Democracia Ourensá tería a chave do goberno unha vez máis, con seis edís, pois a maioría absoluta son catorce, o que fai catro anos supuxo que o PPdeG lle dera a Alcaldía a Gonzalo Pérez Jácome, que podería repetir.
![](https://img-g24-crtvg.flumotion.com/prog24/2023/20230212/ENQUISA_VOZ_frame_2160.png)
En Santiago de Compostela, o PPdeG de Borja Verea pasaría a ser a forza máis votada con dez concelleiros, os que tivo o PSdeG de Xosé Sánchez Bugallo fai catro anos, que quedaría cos oito do seu competidor.
Porén, con catro concelleiros do BNG e tres de Compostela Aberta, podería articular un pacto de investidura para continuar como alcalde.
![](https://img-g24-crtvg.flumotion.com/prog24/2023/20230212/ENQUISA_VOZ_frame_1642.png)
En Pontevedra, unha vez máis, a forza máis votada sería o BNG de Miguel Anxo Fernández Lores, con once edís, a dous da maioría absoluta. Así e todo, ten o goberno garantido salvo un improbable pacto de PPdeG (dez) e PSdeG (catro).
![](https://img-g24-crtvg.flumotion.com/prog24/2023/20230212/ENQUISA_VOZ_frame_3172.png)
En Lugo desaparecería Ciudadanos, con dous edís que absorbería o PPdeG de Elena Candia (doce), que quedaría a un da maioría absoluta, polo que podería continuar o PSdeG de Lara Méndez (oito) de se apoiar na investidura do BNG (cinco).
![](https://img-g24-crtvg.flumotion.com/prog24/2023/20230212/ENQUISA_VOZ_frame_1371.png)
Maioría absoluta en Ferrol
O único cambio que mostra a enquisa é en Ferrol, a menos poboada das sete cidades galegas, onde o PPdeG de José Manuel Rey subiría de doce a trece edís, xusto a maioría absoluta.
Faino a conta do edil que cede o PSdeG de Ángel Mato, que pasa de oito a sete, mentres que BNG e Ferrol en Común manteñen tres e dous respectivamente, polo que os resultados estarían axustados.
![](https://img-g24-crtvg.flumotion.com/prog24/2023/20230212/ENQUISA_VOZ_frame_685.png)
Entre os actuais alcaldes, segundo a enquisa o máis valorado é Abel Caballero, cun 7,37, seguido por Miguel Anxo Fernández Lores, cun 5,51, Inés Rey, cun 5,46, e Lara Méndez, cun 5,34. Non alcanzan o cinco Xosé Sánchez Bugallo, cun 4,59, Ángel Mato, cun 4,45, e Gonzalo Pérez Jácome, cun 3,9.