A campaña "Un neno, un xoguete" xa repartiu máis de 14.000 xoguetes

Na nave de García Barbón de Vigo o traballo é moi intenso estes días. Ata aquí chegan eses xoguetes, novos e usados, que as súas maxestades depositarán baixo a árbore de nadal. Nieves Quiteiro é voluntaria da campaña dende hai 14 anos.

"Aquí probámolos, se funcionan, ben; se non, hai un home que os leva a arranxar e poñémoslles pilas. Ás bonecas lavámoslles a roupa, preparámolas, peiteámolas...".

O soño de moitos pequenos e pequenas faise realidade grazas a campaña "Un neno, un xoguete", que fai quince anos de vida. Levan recollidos 17.000, e xa repartiron 14.500 por toda Galicia. Pero que levan de aquí as súas maxestades?

"Un xoguete novo a cada rapaz, dous xoguetes reciclados non usados, varios quebracabezas, peluches para que teñan as árbores ben cheas".

E nese agasallo, que conta o director da campaña, Carlos Leiro, nunca faltan os libros, moitos doados por unha importante editorial, para non esquecerse da lectura. Aquí colaboran 14 voluntarios en horario de mañá e tarde. O seu traballo comezou en outubro e non se paga con cartos, só con sorrisos e con mostras de agradecemento que saben a biscoito caseiro que traen as propias familias. Javier Sesteira é patrocinador, colaborador e voluntario desta campaña.

"O estar entregándolles cousas aos nenos, ver a cara que teñen de sorpresa e felicidade, o agradecemento das nais. É algo que ten que ser imprescindible para un pequeno, é dicir, cada neno debe ter un xoguete".

Ata o 2 de xaneiro recollerán xoguetes na nave de García Barbón de Vigo. Eles tamén teñen a súa petición para as súas maxestades. Conseguir un local que poidan converter nun banco de xoguetes, para que esta recollida e entrega, poida facerse todo o ano naquelas familias onde máis se necesita.