A creatividade da veciñanza de Figueiroa transforma a aldea durante o Nadal

Foi no 2020, en plena pandemia, cando a veciñanza de Figueiroa, no concello de Boborás, decidiu trasladar á rúa o seu espírito do Nadal e crearon o que se coñece como a Ruta dos Beléns.

Jaime e Loli foron uns dos promotores. Cada ano por estas datan abren o seu xardín para amosar o nacemento con figuras a tamaño real, creadas por eles, onde os personaxes van cambiando en función do momento no que nos atopamos.

Tamén hai beléns feitos con piñas ou con follas de millo e mesmo algúns onde teñen cabida todo tipo de personaxes. Casiñas para os trasnos, feitas de madeira e decoradas tanto por dentro como por fóra, son outro dos reclamos desta decoración de Nadal que cada ano atrae a máis visitantes.