A dereita acariña en Suecia o poder cun punto de vantaxe á falta do reconto do voto exterior

A oposición de dereita podería gobernar en Suecia tras unha apertada vitoria nas eleccións lexislativas, condicionada ao reconto oficial, incluído o voto exterior, e coa incógnita de quen o lideraría ao converterse a ultradereita en forza máis votada dentro dese bloque.

Escrutados o 92 % dos distritos electorais, a oposición obtén a 49,7 % fronte ao 48,8 % do centroesquerda da primeira ministra socialdemócrata Magdalena Andersson e 176 deputados fronte a 173.

O Partido Socialdemócrata, forza que dominou a política sueca no último século, repetiría a posición de forza máis votada co 30,5 %, dous puntos máis que en 2018, e por diante do ultradereitista Demócratas de Suecia (SD), co 20,7 %, tres puntos máis.

O Partido Moderado (conservador), do líder da oposición Ulf Kristersson, baixaría á terceira praza co 19 %. O Partido Centrista e o Partido de Esquerda, aliados de Andersson, empatan na cuarta praza co 6,7 %, un retroceso de sete décimas e mais dun punto respectivamente, ; e o Partido do Medio, no mesmo bloque, baixa un punto ata o 5 %.

A curta distancia entre ambos os bloques, cifrada nuns 50.000 votos, obrigará a esperar o resultado preliminar actualizado deste mércores, que inclúe as papeletas do exterior e os votos anticipados enviados por correo dentro do prazo, pero que non chegaron aos distritos electorais o domingo.