A familia do desaparecido en Teo hai dez días segue a organizar batidas
Teñen o convencemento de que non marchou por vontade propia
Óscar García Lema, de 62 anos, mide 1,82 metros e pesa 85 quilos
A familia de Óscar García Lema, de 62 anos, fai unha chamada desesperada. Piden axuda para localizar este veciño de Teo, desaparecido hai dez días no lugar de Cepeda, en Cacheiras.
Continúan organizando batidas para tentar dar co seu paradoiro. Cando se lle perdeu a pista, saíra da casa para comer coa familia en Santiago, pero non se presentou.
No domicilio deixou o móbil, a carteira coa documentación, as lentes e as chaves do coche dentro do vehículo. A familia está convencida de que non marchou por vontade propia.
De complexión forte, mide 1,82 metros de estatura e pesa 85 quilos. Cando desapareceu, vestía roupa escura.
