A Fiscalía alerta dun "preocupante" ascenso do 45 % de agresións sexuais de menores

A Fiscalía Xeral do Estado denunciou un "notabilísimo e preocupante ascenso" das agresións sexuais perpetradas por menores de idade en 2022: o ministerio público investigou uns 974 casos fronte aos 668 rexistrados en 2021, o cal supón un aumento do 45,8 por cento.

Na súa memoria anual relativa ao ano 2022, o Ministerio Público cualifica de "alarmante" que as incoacións de agresións sexuais con autores menores aumentasen un 116 % desde o ano 2017, con crecementos anuais desde esa data.

Tamén se investigaron 1.973 abusos sexuais cometidos por menores de 18 anos en 2022, un 0,81 % máis que o ano anterior.

A Fiscalía sinala na súa memoria que as causas que explican este "auxe" son "complexas" e que son diversos os factores que levan aos menores a "realizar condutas sexuais virulentas".

Destaca entre elas a carencia dunha adecuada formación en materia ético-sexual e o visionado "inapropiado e precoz" de pornografía violenta: ambos os factores conducen a unha "trivialización do seu concepto das relacións sexuais normais".

Un 30 % máis de agresións sexuais

Os delitos de agresión sexual investigados, máis aló dos cometidos por menores, tamén creceron. En concreto, un 31,5 %, ata os 9.603 casos, máis de dous mil por encima dos 7.302 de 2021.

O Ministerio Público explica que a entrada en vigor da Lei de Garantía Integral da Liberdade Sexual (coñecida como lei do só si é si) puido ter unha incidencia substancial nestes datos, ao unificar nun único tipo penal os abusos e as agresións sexuais a partir do 6 de outubro de 2022.

Por contra, os abusos sexuais investigados caen un 3,39 % ao pasar de 8.937 a 8.634 casos incoados. Si crecen os abusos sexuais contra vítimas menores de 16 anos, un 2,86 %. E moito máis as agresións sexuais a nenas con menos de 16 anos, un 36,44 %.

A Fiscalía alerta dun aumento de delitos contra a liberdade sexual cometidos a través de Internet e aqueles que se perpetran na contorna lúdica, no que é habitual a submisión química das vítimas con alcol ou outro tipo de substancias.

Impunidade e violencia sexual oculta

Denuncia a Fiscalía que se mantén un "indefinido índice de impunidade porque as condutas non afloran, perpétranse con gran frecuencia ao aproveitarse das relacións próximas entre vítima e agresor (familia, colexio, clubs deportivos…)": "É responsabilidade de todos crear un clima de apoio para que as vítimas saian do seu silencio", recalca.

Agora ben, recoñece que a Lei de Garantía Integral da Liberdade Sexual e a súa posterior modificación puxeron "no punto de mira" os delitos sexuais e que as campañas de sensibilización son eficaces.

A sensibilización, matiza, contribúe a que se denuncien cada vez máis estes delitos, do mesmo xeito que "a repercusión mediática e social que tiveron determinados casos fortaleceron as vítimas e animáronas a denunciar ao sentirse apoiadas polas manifestacións públicas de colectivos concretos e da sociedade en xeral en repudia destes delitos".

Cento corenta e sete procedementos por abusos a menores no seo da Igrexa

Na súa memoria, a Fiscalía dedica un apartado aos casos de abusos a menores cometidos no ámbito da Igrexa.

En xaneiro de 2022 esta solicitou ás fiscalías autonómicas que lle enviasen todas as denuncias e querelas en tramitación sobre agresións e abusos sexuais a menores cometidas por relixiosos.

O Ministerio Público recoñece a dificultade de dar conta dos procedementos xudiciais, ao non quedar rexistrados como tales nas aplicacións de xestión procesual, dado que non fan mención ningunha á profesión do suxeito activo.

E admite que os datos de que dispón son "moi parciais" debido ao acoutado espazo temporal a que pertence a documentación remitida, posto que a maior parte dos testemuños se refire a procedementos que tiveron a súa orixe no ano 2021 e 2022, e só puntualmente se remitironde anos anteriores.

Así, os datos da memoria indican que foron remitidos polas fiscalías territoriais un total de 147 procedementos, dos que 61 foron tramitados en sede fiscal e 86 en sede xudicial.

Das 61 dilixencias de investigación que constan rexistradas nas fiscalías territoriais, un 44 % iniciouse en 2022, un 26 % en 2021 e o 30 % restante en anos anteriores, mentres que das 86 dilixencias previas remitidas, un 18 % foron iniciadas en 2022, un 29 % en 2021 e o 53 % restante en anos anteriores.

A Fiscalía sinala que no 67 % dos casos os feitos tiveron lugar despois do ano 2000 e no 33 % antes de 1990.

E das 20 sentenzas remitidas de procedementos xudiciais finalizados, 19 son condenatorias (dúas con conformidade do acusado, mentres que unha foi revogada en apelación).

A Fiscalía destaca a necesidade de revisar a posible solicitude de responsabilidade civil subsidiaria da institución relixiosa en que tivo lugar o abuso, avaliar a extensión da acusación ás posibles condutas encubridoras por parte dos representantes das institucións relixiosas e determinar unha indemnización en concepto de responsabilidade civil, que ten que integrar os danos morais e as lesións psíquicas.