A Fiscalía investiga as verteduras de 'pellets' nas praias de Tarragona

A Fiscalía de Tarragona investiga as verteduras de pellets que desde hai anos asolagan algunhas praias da provincia, unhas dilixencias que xa se abriron polo menos en dúas ocasións, pero as  investigacións arquiváronse sen chegar ao xulgado porque non foi posible concretar quen eran os responsables das verteduras.

Estas dilixencias abríronse nos anos 2019 e 2021 por mor de denuncias presentadas polo Seprona da Garda Civil e por unha organización ecoloxista da zona. 

Agora, a pedimento do Fiscal de Sala de Medio Ambiente, Antonio Vercher, o ministerio público abriu unhas novas dilixencias por un delito ambiental, coincidindo coa vertedura de pellets que desde hai semanas afecta a costa galega, segundo avanzou El País e confirmaron a EFE fontes fiscais.

Nesta ocasión, as verteduras levaron a actuar á Generalitat, que abriu un expediente contra oito empresas químicas dos polígonos industriais de Tarragona polos pellets achados na area, un material que serve para a fabricación de plásticos.

Ademais, nestas últimas semanas grupos de voluntarios están a limpar de pellets a area da praia da Pineda, en Vila-seca (Tarragona), unha das máis afectadas da zona polas verteduras. Segundo as entidades ecoloxistas, esta praia é unha das máis damnificadas por microplásticos do mundo.