Investigados os responsables de dúas empresas por un vertedorio ilegal en Bergondo

A Unidade de Protección da Natureza da Garda Civil da Coruña investigou os responsables de dúas empresas por un suposto delito de falsidade en documento público e mercantil tras xerar unha entulleira irregular de residuos de demolición.

Os feitos, segundo informou este martes a Garda Civil, ocorreron cando unha patrulla realizaba un servizo en Bergondo e localizou o enterramento nunha parcela rústica de residuos provenientes da demolición de edificacións, que eran cubertos con terra, dando lugar a unha entulleira irregular.

Iniciouse así unha investigación en que a Garda Civil comprobou que, segundo o proxecto presentado para a concesión de licenza de demolición, estes residuos deberían tratarse a través dunha empresa autorizada. A empresa, con todo, presentou os documentos emitidos por outra compañía autorizada para a súa xestión amparando o traslado e entrega dos residuos xerados na demolición na planta deste xestor.

Na verificación da autenticidade destes documentos, os axentes comprobaron que os transportes e entregas non se realizaron e que os xustificantes presentados se emitiron para tratar de xustificar a legalidade da xestión dos residuos e evitar posibles sancións. Así, a Garda Civil procedeu á investigación dos responsables destas dúas empresas como supostos autores dun delito de falsidade en documento público e mercantil.

Tamén se procedeu á confección das pertinentes actas-denuncia a estas dúas compañías e á propietaria do terreo onde se enterraron os residuos.