A inflación modérase ata o 2,8 % polo abaratamento de electricidade e alimentos

Os prezos subiron en xullo un 2,8 % en España en comparación co mesmo mes do pasado ano, seis décimas menos que en xuño (3,4 %), grazas ao abaratamento dos prezos da electricidade e os alimentos.

De acordo co avance do Índice de Prezos de Consumo (IPC) publicado este martes polo Instituto Nacional de Estatística (INE), o prezo da electricidade baixou en xullo máis que no mesmo mes de 2023 e os alimentos abaratáronse, cando o pasado ano se encarecían.

Tamén contribuíu a moderar a inflación o prezo do lecer e a cultura, que subiu menos que en 2023.

De confirmárense estes datos o próximo día 13 de agosto, a inflación encadearía dous meses consecutivos á baixa tras a repunta experimentado na primavera, que a levou ao 3,6 % en maio.

A inflación subxacente, que non ten en conta a enerxía nin os alimentos non elaborados por seren os compoñentes máis volátiles, tamén baixou ata o 2,8 %, dúas décimas menos que en xuño.

O ministro de Economía Carlos Cuerpo destacou a "moderación progresiva dos prezos", na que foron claves a baixada da electricidade e dos alimentos, que confirma a "fortaleza" da economía española.

En termos mensuais, os prezos baixaron un 0,5 % en xullo con respecto a xuño (un mes en que subiran un 0,4 %), o cal supón o primeiro retroceso desde novembro do pasado ano.

En xullo, o Índice de Prezos de Consumo Harmonizado (IPCH) situouse no 2,9 %, sete décimas por baixo do dato de xuño, e a variación mensual mostra un retroceso do 0,7 % con respecto ao mes anterior.