A insuficiente vitoria de Erdogan anticipa unha disputada segunda volta para decidir o futuro de Turquía

As eleccións deste domingo en Turquía non despexaron o panorama claro para o país.

O presidente de Turquía, o islamita Recep Tayyip Erdogan, gañou este domingo as presidenciais pero sen a maioría absoluta necesaria para evitar unha segunda volta en dúas semanas ante o candidato opositor, o socialdemócrata Kemal Kiliçdaroglu, cando escrutou o 90 % das mesas.

A axencia oficialista Anadolu dálle a Erdogan, que leva dúas décadas no poder, o 49,7 % dos votos, mentres ANKA, unha axencia privada independente, co 93 % escrutado, outórgalle o 49,1 % dos sufraxios. Para o aspirante opositor ANKA atribúelle o 45,2 % a Kiliçdaroglu e Anadolu o 44,5 %.

Un terceiro candidato, o nacionalista Sinan Ogan, lograría o 5,3 % das papeletas.

O país está abocado así a unha segunda volta que se anticipa tumultuosa e en xogo se continúa no poder o home forte desde hai 20 anos, o actual presidente Recep Tayyip Erdogan.

A oposición denuncia manipulación electoral e procllámase vencedora

O socialdemócrata CHP, o principal partido da oposición turca, denunciou que nas presidenciais deste domingo houbo unha "manipulación" na difusión dos resultados e afirmou que o seu candidato, Kemal Kiliçdaroglu, gañou ao actual xefe do Estado, Recep Tayyip Erdogan.

"Hai 7,5 millóns de votos que non entraron no sistema. Veñen de sitios onde somos máis fortes. Manipulan os resultados e deixan á xente toda a noite diante da televisión", acusou hoxe o alcalde de Istambul e aspirante á vicepresidencia do país, Ekrem Imamoglu.

Os alcaldes de Istambul, Ekrem Imamoglu, e de Ankara, Mansur Yavas, ambos os candidatos a vicepresidente en caso de vitoria opositora, compareceron varias veces durante a noite para criticar os datos ofrecidos pola axencia de Anadolu, que cualificaron de “manipulados”.

Na súa última comparecencia aseguraron que, segundo os datos solicitados polo partido, Kiliçdaroglu iría por diante no reconto co 48 %-49 % do voto, sacando tres puntos de vantaxe a Erdogan.

“Imos por diante en Istambul e Ankara”, afirmou nunha comparecencia o alcalde da capital. Imamoglu lembrou tamén como nas eleccións de 2019, a axencia Anadolu comezou mostrando ao candidato progobernamental como vencedor nos comicios á alcaldía de Istambul para, a medida que avanzaba o reconto e a súa candidatura progresaba en apoio, cortar a transmisión de datos aos medios.

Por iso, instaron aos voluntarios e simpatizantes do partido a non abandonar os colexios electorais ata que se termine de contar o último voto.

Nas eleccións parlamentarias, que tamén se celebran hoxe, a alianza formada ao redor do AKP, o partido islamita de Erdogan, tería o 50 % dos votos e 325 dos 600 deputados do Parlamento, co que mantería a maioría absoluta que ten desde hai 20 anos.

O CHP e os seus aliados obterían o 34 % e 215 deputados, e o partido esquerdista e prol kurdo HDP e os seus aliados terían 60, cando se abriron xa o 82 % das urnas.